ملائیشیا: بچے کو ٹکر مارنے پر ہاتھیوں کا شدید انتقام، کارسواروں کے ساتھ کیا ہوا؟

کہتے ہیں کہ ہاتھی کی دشمنی بڑی مہنگی پڑتی ہے کیوں کہ وہ اپنے دشمن کو بھولتا نہیں ہے اور پھر اگر بات ہو اس کے خاندان کے بچوں کی تب تو وہ بالکل بھی کوئی رعایت نہیں برتتا۔ ایک ایسا ہی تلخ تجربہ ملائیشیا کی ایک فیملی کو پیش آیا جب ہائی وے پر گزرتے ہوئے ان کی گاڑی سے ہاتھی کا ایک بچہ ٹکراگیا۔

سی این این کے مطابق48 سالہ محمد ازیان محمد نور اپنی اہلیہ اور بیٹے کے ساتھ جزیرہ پینانگ سے ریاست ٹیرینگانو جا رہے تھے۔ شام 7:30 بجے کے قریب بوندا باندی اور دھند کے باعث موسم کی صورتحال خراب تھی۔

جب محمد نور نے ہائی وے پر ایک موڑ کاٹا تو ان کی گاڑی ہاتھیوں کے ایک ریوڑ کے ساتھ چلتے ہاتھی کے بچے سے ٹکرا گئی اور وہ زمین پر آ رہا۔ بس پھر کیا تھا ریوڑ کے 5 ہٹے کٹے ہاتھیوں نے محمد نور کی کار پر دھاوا بول دیا اور اسے روندنے لگے۔ حالاں کہ ہاتھی کے بچے کو کچھ بھی نہیں ہوا اور وہ بھلا چنگا اٹھ کر اپنے بڑوں کی کارگزاری سے محظوظ بھی ہوتا رہا لیکن ان ہاتھیوں کو یہ بات کون سمجھاتا وہاں تو تیر کمان سے نکل چکا تھا۔

ہاتھیوں نے کار کے بائیں دروازوں کو روند دیا اور پچھلی ونڈ اسکرین بھی توڑ دی۔ وہ ایک انتہائی خوفناک منظر تھا کیونکہ ہاتھی نہ صرف کار کا تیا پانچا کرنے میں لگے تھے بلکہ ساتھ ہی زور زور سے چنگھاڑ بھی رہے تھے اور لگتا تھا کہ وہ گاڑی کو الٹانے کی بھی کوشش میں لگے تھے۔

گاڑی کے اگلے حصے اور دروازوں کو شدید نقصان پہنچا اور تمام کھڑکیوں کے شیشے بھی ٹوٹ گئے تاہم محمد نور ان کے بیوی بیٹے کی قسمت اچھی تھی کہ وہ لوگ زخمی ہونے سے بچ گئے کیوں کہ گاڑی پر کافی دیر تک اپنا غصہ نکالنے کے بعد ہاتھیوں کا جھنڈ اپنے بچے کو لے کر وہاں سے روانہ ہوگیا۔

محمد نور نے میڈیا کو بتایا کہ پچھلی سیٹ پر بیٹھی ان کی اہلیہ بھی بہت زیادہ ڈر گئی تھیں اور چلاتے ہوئے انہیں بار بار یہ ’یقین دلا رہی تھیں‘ کہ وہ سب آج مارے ہی جائیں گے۔

یہ کوئی اپنی نوعیت کا واحد واقعہ نہیں۔ جیسے جیسے ملائیشیا کی شاہراہیں تیزی سے پھیل رہی ہیں ملک کے ہاتھی بھی تیزی سے اپنا مسکن کھو رہے ہیں جس کے نتیجے میں اس طرح کے حادثات کا ایک سلسلہ شروع ہوچکا ہے۔ اس صورتحال پر ہاتھی پہلے ہی پریشان ہیں اور ایسے میں اگر کوئی بدقست کار سوار انہیں کوئی معمولی گزند بھی پہنچا دے یا کسی اور طور پر خلل اندازی کرے تو پھر وہ دنگا کرنے سے نہیں چوکتے۔

ماہر جنگلی حیات جوائس پول کا کہنا ہے کہ اگر کسی انسان کے بچے کو کوئی گاڑی ٹکر مار دے تو وہ بھی ڈرائیور کی لاپرواہی پر چراغ پا ہوجائیں گے اور چلانا شروع کردیں گے ہاتھیوں نے بھی بالکل ایسا ہی کیا جو کہ ایک قدرتی بات ہے۔