’ٹور دی اسلام آباد‘ نامی سائیکل ریس کے لیے ملک بھر سے پروفیشنل سائیکلسٹس دارلحکومت کا رخ کر لیا ہے۔ ریس کے پہلے دن سائیکلسٹس نے اسلام آباد کے پرانے چڑیا گھر سے مونال ریسٹورنٹ تک سائیکلنگ کی۔ ریس کے دوسرے دن سائیکلسٹس اسلام آباد سے مری تک 68 کلومیٹر کا سفر کریں گے اور تیسرے اور آخری دن اسلام آباد شہر کے اندر ہی سو کلومیٹر تک کے ٹریک پر سائیکلنگ کریں گے۔
وی نیوز سے گفتگو کرتے ہوئے لکی مروت سے آئے سائیکلسٹ حضرت بلال نے بتایا کہ وہ اپنے ڈویژن سے اس ریس کے لیے آنے والے واحد فرد ہیں۔
بلال کے مطابق اس پسماندہ علاقے میں وہ کھیتی باڑی کر کے اپنے معاملاتِ زندگی چلاتے ہیں۔ بلوچستان سے تعلق رکھنے والی ثمرین خان کے مطابق چونکہ بلوچستان کی کوئی ٹیم نہیں ہے، اس لیے وہ خیبر پختونخواہ کی نمائندگی کر رہی ہیں۔
ثمرین خان کا کہنا تھا کہ انہیں اس سے کوئی فرق نہیں پڑتا کہ وہ بلوچستان کی نمائندگی کیوں نہیں کر رہی ہیں‘ کیونکہ وہ ہر جگہ پاکستان کی ہی نمائندگی کر رہی ہوتی ہیں۔ اسلام آباد کے محمد دانش کے بقول اس ریس کی تیاری کے لیے انہیں روزانہ 4، 5 گھنٹے پریکٹس کرنا پڑتی ہے۔
