ایشیائی ترقیاتی بینک نے مالیاتی شعبے تک خواتین کی رسائی میں اضافے اور چھوٹے و درمیانے درجے کے کاروبار کے لیے خواتین کوقرضوں کی فراہمی کے ضمن میں پاکستان کے لیے 15 کروڑ 55 لاکھ ڈالر کی معاونت کی منطوری دے دی۔
بینک کی طرف سے پیر کو جاری اعلامیے کے مطابق اس معاونت میں 10 کروڑ ڈالر کاپالیسی قرضہ بھی شامل ہے جو مالیات تک خواتین کی رسائی بڑھانے کے لیے قانونی اور ضابطہ جاتی اصلاحات کے لیے بروئے کار لایاجائے گا۔ جبکہ کروڑ ڈالر مالیاتی انٹرمیڈیٹیشن قرضہ بھی اس معاونت کاحصہ ہے جس کے تحت خواتین کو قرضے کی فراہمی کے لیے مالیاتی اداروں کی مد د کی جائے گی۔
علاوہ ازیں مالیات سے متعلق سرگرمیوں کے کیے 55 لاکھ ڈالر کی مزید معاونت بھی فراہم کی جائے گی۔ ایشیائی ترقیاتی بینک کےڈائریکٹر جنرل برائے وسطی ومغربی ایشیا یوگینی زکوپ نے اپنے بیان میں کہاہے کہ خواتین کی شمولیت اور انہیں مساوی اقتصادی مواقع فراہم کیے بغیر جامع ،موزوں اور پائیدار ترقی کاحصول ناممکن ہے۔
انہوں نے کہا کہ بینک کی اس معاونت سے مالیاتی ایکو سسٹم کو بہتر بنانے، مالیات میں خواتین کی رسائی میں اضافے اور خواتین کو بااختیاربنانے و انہیں روزگار کی فراہمی میں مدد ملے گی۔
ملکی افرادی قومت میں خواتین کا حصہ کتنے فیصد ہے؟
اعلامیے کے مطابق پاکستان کی افرادی قوت میں خواتین کاحصہ 23 فیصد جبکہ کاروبار میں ان کی شمولیت کی شرح دنیا کے دیگر ممالک کے مقابلے میں کم ہے۔
مزید پڑھیں
اے ڈی بی کے سینیئر ماہر معاشیات اینڈریو میکارتے نے بتایا کہ پاکستان میں کاروباری خواتین کی ایک تعداد موجود ہے تاہم ان کی موجودگی کااعتراف نہیں کیا جاتا ۔
اینڈریو میکارتے کا کہنا ہے کہ کاروباری خواتین کی استعدادکارمیں بہتری اور ان کے لیے سازگار ماحول کی فراہمی کے لئے پالیسی اصلاحات ضروری ہیں۔
