پاکستان تحریک انصاف کے بانی رہنما اکبر ایس بابر نے کہا ہے کہ کہا جارہا ہے کہ وہ ووٹر لسٹ میں نہیں حالانکہ عدالتی فیصلے آچکے ہیں جن میں کہا گیا ہے کہ وہ پی ٹی آئی کا حصہ ہیں۔
الیکشن کمیشن کے باہر میڈیا سے گفتگو کرتے ہوئے انہوں نے کہا کہ پی ٹی آئی جس جس فورم پر جھوٹ بولے گی ہم وہاں جا کر بتائیں گے، ہم ہر فورم پر ان کے خلاف توہین عدالت کا کیس کریں گے۔
اکبر ایس بابر کا کہنا تھا کہ ہر سیاسی جماعت کے ورکر کو حق حاصل ہے کہ وہ انتخابی عمل میں حصہ لے لیکن تحریک انصاف کا تو کام ہی جھوٹ بولنا ہے۔
انہوں نے کہا کہ یہ دعوی کیا جاتا تھا کہ میں سب کو رلاؤں گا، آج پی ٹی آئی جن حالات میں ہے یہ اللہ کا نظام ہے، جزا اور سزا کا قانون جب تک لاگو نہیں ہو گا بہتری نہیں آئے گی۔
اکبر بابر نے کہا کہ انتشار پھیلانے والوں کو سزا ملنی چاہیے، یہ پارٹی نوجوانوں کو ورغلا رہی ہے۔ انہوں نے مزید کہا کہ پی ٹی آئی کے جھوٹ بولنے پر پاکستان بار کونسل میں بھی درخواست دیں گے۔