انڈر 19 ایشیا کپ: پاکستان نے افغانستان کو شکست دے کر سیمی فائنل کے لیے کوالیفائی کر لیا

منگل 12 دسمبر 2023
icon-facebook icon-twitter icon-whatsapp

انڈر 19 ایشیا کپ میں پاکستان کرکٹ ٹیم کی کامیابیوں کا سفر جاری ہے اور آج کے میچ میں افغانستان کو 83 رنز سے شکست دے کر مسلسل تیسری فتح اپنے نام کر لی ہے اور سیمی فائنل کے لیے کوالیفائی کر لیا ہے۔

پاکستانی ٹیم اب تک ناقابل شکست ہے اور گروپ اسٹیج میں پہلی پوزیشن پر براجمان ہے۔

دبئی میں کھیلے جا رہے اے سی سی انڈر 19 کرکٹ ایشیا کپ میں آج کے میچ میں افغانستان نے ٹاس جیت کر پہلے فیلڈنگ کا فیصلہ کیا اور پاکستانی ٹیم کو بیٹنگ کرنے کی دعوت دی۔

پاکستان کرکٹ ٹیم پہلے بیٹنگ کرتے ہوئے 48 اوورز میں 303 رنز بنا کر آل آؤٹ ہو گئی۔

پاکستانی اوپنرز نے ٹیم کو اچھا آغاز فراہم کیا۔ شمائل حسین نے 75 اور شاہزیب خان نے 79 رنز کی شاندار اننگز کھیلی، اس کے علاوہ ریاض اللہ 73 اسکور کر کے نمایاں رہے۔

اس کے بعد اذان اویس نے 20، سعد بیگ 8، طیب عارف نے 6، عرفات منہاس 4، عامر حسن 8، خبیب خلیل 3 اور عبید شاہ نے ایک رنز اسکور کیا۔ جبکہ محمد ذیشان صفر پر ہی آؤٹ ہو گئے۔

جواب میں 304 رنز کے ہدف کے تعاقب میں افغانستان کی ٹیم جم کر نہ کھیل سکی اور پوری ٹیم 49 ویں اوورز میں 220 رنز بنا کر آؤٹ ہو گئی۔

افغانستان کے بیٹر نعمان شاہ 54 رنز بنا کر نمایاں رہے، اس کے علاوہ وفی اللہ اور فریدون نے 32،32 رنز بنائے۔

پاکستان کی جانب سے عبید شاہ اور طیب عارف نے 3،3 کھلاڑیوں کو پویلین کی راہ دکھائی جبکہ خبیب خلیل نے 2 وکٹیں حاصل کیں، اس کے علاوہ عامر حسین اور شمائل ایک ایک وکٹ لینے میں کامیاب رہے۔

یاد رہے کہ قومی انڈر 19 ٹیم نے اس سے قبل نیپال اور بھارت کو شکست دی ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

icon-facebook icon-twitter icon-whatsapp