چیف الیکشن کمشنر گلگت بلتستان راجہ شہباز خان نے وزیر تعلیم غلام شہزاد آغا کی اسمبلی رکنیت معطل کردی۔
غلام شہزاد آغا 2020 کے انتخابات میں پاکستان پیپلز پارٹی کے پلیٹ فارم سے ٹیکنوکریٹ ممبر منتخب ہوئے تھے اور سابق وزیر اعلیٰ گلگت بلتستان خالد خورشید نااہلی کیس کے پٹیشنر تھے۔
خالد خورشید نااہلی کیس کے تفصیلی فیصلے میں چیف کورٹ گلگت بلتستان نے خالد خورشید کو نااہل قرار دینے کے علاوہ غلام شہزاد آغا کے خلاف حقائق چھپانے کے الزام میں اسپیکر کو ریفرنس بناکر الیکشن کمیشن بھیجنے کا حکم دیا تھا۔
پاکستان تحریک انصاف کے صوبائی صدر و سابق وزیر اعلیٰ خالد خورشید کے خلاف پٹیشن کے دوران یہ بات سامنے آئی تھی کہ درخواست گزار غلام شہزاد آغا کا نام انسدادِ دہشت گردی قانون کے شیڈول فور میں شامل ہیں اور انہوں نے اس ضمن میں اس حقیقت کا کہیں ذکر نہیں کیا تھا۔
لہٰذا چیف کورٹ گلگت بلتستان نے حقائق چھپانے کے الزام میں اسپیکر گلگت بلتستان اسمبلی کو ریفرنس بناکر الیکشن کمیشن کو بھیجنے کا حکم دیا تھا۔
چیف الیکشن کمشنر گلگت بلتستان نے اس کیس کی سماعت کرتے ہوئے غلام شہزاد آغا کو کئی مرتبہ ذاتی حیثیت میں پیش ہونےکا حکم دیا تھا تاہم متعدد سماعتوں میں غلام شہزاد آغا پیش نہیں ہوئے، جس کے بعد آج ان کی اسمبلی رکنیت معطل کردی گئی ہے۔
چیف الیکشن کمشنر گلگت بلتستان راجہ شہباز خان کے حکمنامے کے مطابق غلام شہزاد آغا کو کابینہ اور اسمبلی اجلاس میں بیٹھنے اور قومی جھںڈے والی سرکاری گاڑی استعمال کرنے سے روکنے کا بھی حکم دیا ہے۔
