پاکستان تحریک انصاف (پی ٹی آئی) کے وکیل عمیر نیازی نے کہا ہے کہ اس وقت اسٹیبلشمنٹ عمران خان سے ڈیل کرنا چاہتی ہے مگر عمران خان ان کی کوئی ڈیل نہیں مان رہے۔
وی نیوز کو انٹرویو دیتے ہوئے عمیر نیازی نے کہا، ’مجھے پارٹی نے ٹکٹ دیا تو الیکشن ضرور لڑوں گا، میں عمران خان کا رشتہ دار نہیں ہوں، میری برداری بھی نیازی ہے اور عمران خان بھی نیازی ہیں۔
عمیر نیازی کا کہنا تھا، ’میں نے لاہور ہائیکورٹ میں دراخوست بیوروکریسی کو ریٹرننگ آفیسرز کے طور پر لگانے کے خلاف دائر کی تھی نہ کہ الیکشن آگے لے جانے کے لیے، اس سے پہلے جتنے بھی انتخابات ہوئے ہیں، ان میں جج صاحبان کو ریٹرننگ آفیسرز لگایا گیا تھا، اس بنیاد پر یہ دراخوست دائر کی گئی تھی۔
انہوں نے کہا کہ چیف جسٹس آف پاکستان جسٹس قاضی فائز عیسیٰ جب بلائیں گے تو وہ انہیں جواب دیں گے کہ انہوں نے یہ دراخوست کیوں دائر کی تھی۔
عمران خان اور فواد چوہدری کی ملاقات سے متعلق انہوں نے کہا کہ جب یہ ملاقات ہوئی تو وہ وہاں موجود تھے، فواد چوہدری نے عمران خان کو مصافحہ کیا اور حال چال پوچھا تو عمران خان نے ان سے سوال کیا، ’تم کس کیس میں آج کل اندر ہو‘، جس پر فواد چوہدری نے جواب دیا، ’آپ کی محبت میں‘۔
