مسلم لیگ ن کی سینئر نائب صدر مریم نواز نے کہا ہے کہ عمران داری کا ٹرک ڈرائیوروں سمیت پکڑا جا چکا ہے، ہمیشہ کی طرح شیر ہی قوم کو مسائل اور انہیں پیدا کرنے والے گیدڑوں سے نجات دلائے گا۔
پاکستان مسلم لیگ (ن) گوجرانوالہ ڈویژن کی مرکزی تنظیم کا اجلاس سینئر نائب صدر اور چیف آرگنائزر مریم نواز کی زیر صدارت ہوا، پارٹی کے مرکزی سینئر راہنما خواجہ آصف، پرویز رشید اور پارٹی کے پنجاب کے صدر رانا ثناء اللہ خاں بھی اجلاس میں شریک ہوئے۔
انجینئر خرم دستگیر خان اور علاقے سے دیگر ارکان قومی و صوبائی اسمبلی سمیت پارٹی کے ڈپٹی سیکرٹری جنرل عطاء اللہ تارڑ بھی اجلاس میں شریک ہوئے۔ اجلاس میں گوجرانوالہ میں بھرپور تنظیمی کنونشن پر ڈویژن کے عہدیداروں اور کارکنوں کی کارکردگی کو سراہا گیا۔
اس موقع پر خطاب کرتے ہوئے مریم نواز نے کہا کہ الیکشن ہو یا فسطائیت کا مقابلہ، گوجرانوالہ سب سے آگے ہے۔ ٹیم گوجرانوالہ نے پارٹی کے دیگر ڈویژنز کو چیلنج دیا ہے۔ امید اور یقین ہے کہ پارٹی کے تمام ڈویژنز اس چیلنج کو قبول کریں گے۔
لیگی راہنما نے کہا کہ تنظیمی کنونشن پارٹی کو مزید بہتر، مضبوط اور فعال بنانے کا ذریعہ ثابت ہوئے ہیں۔ مسلم لیگ ن کو مٹانے والے اللہ کے کرم سے خود مٹ گئے۔ الحمداللہ، ہماری قیادت ایمان دار، نیک نام اور عوام کی کارکردگی کے امتحان میں سرخرو ہوئی۔
انہوں نے کہا کہ الزام لگانے والے آج منہ چھپاتے پھرتے ہیں، پتلی تماشہ کرنے والے گھروں میں قید ہوچکے ہیں۔ مشکل معاشی حالات میں ڈوبا ملک پہلی بار ہمیں نہیں ملا۔ ملک مسائل میں جب ڈوب جاتا ہے، تب ہی نواز شریف اور شہباز شریف کو آنا پڑتا ہے۔
مریم نواز نے کہا کہ آج مشکلات ضرور ہیں لیکن اللہ تعالیٰ کی مدد سے لوڈ شیڈنگ کے اندھیروں کی طرح معاشی اندھیرے بھی ختم ہوں گے۔ سازشیوں کی سازش ہے کہ معیشت نہ سنبھلے۔ ہمیشہ کی طرح شیر ہی قوم کو مسائل اور انہیں پیدا کرنے والے گیدڑوں سے نجات دلائے گا۔
انہوں نے کہا کہ عمران داری کا ٹرک ڈرائیوروں سمیت پکڑا جا چکا ہے۔ مریم نواز کے اس جملے پر اجلاس میں قہقے لگ گئے۔ اجلاس کے شرکاء نے کہا کہ مریم نواز لیگی کارکنوں کی آواز بن چکی ہیں۔
