سابق وزیر خارجہ اور پاکستان پیپلز پارٹی کے چیئرمین بلاول بھٹو زرداری نے کہا ہے کہ انہوں نے پنجاب میں اپنی پارٹی کی کامیابی کے لیے کاوشوں کا آغاز کردیا ہے۔
منگل کو لاہور میں صحافیوں سے غیر رسمی گفتگو کے دوران جب ان سے پوچھا گیا کہ وہ سندھ اور بلوچستان کے بعد پنجاب بشمول لاہور کو فتح کرنے کب آرہے ہیں تو بلاول بھٹو زرداری نے کہا کہ اس پر ’کام شروع کردیا گیا ہے‘۔
جب ان سے پوچھا گیا کہ نواز شریف نے کہا تھا کہ (الیکشن 2018) میں کراچی اور سندھ میں ن لیگ کے ووٹ کسی اور کو دے دیے گئے تو انہوں نے کسی پارٹی کی جانب سے مبینہ طور پر الیکشن چوری کا تذکرہ کیے بغیر جواب دیا کہ ’ہم ایسے ہی نہیں کہتے کہ گلی گلی میں شور ہے۔۔۔‘
واضح رہے کہ پنجاب میں پیپلز پارٹی کے زوال کی سب سے بڑی وجہ 1977 کے بعد پارٹی کا پنجاب میں برسرِ اقتدار نہ آنا ہے ۔ سنہ 1985 کے غیر جماعتی انتخابات اور پھر سنہ 1988 کے انتخابات میں پیپلز پارٹی پنجاب سے بیدخل ہوگئی تھی اور اس کے پاس سیٹوں کی گنتی کے اعتبار سے وہ عوامی سپورٹ نہیں رہی جو اسے بلاول کے نانا اور بینظیر بھٹو کے والد اور بانی چیئرمین پی پی پی ذوالفقار علی بھٹو کی قیادت میں سنہ 1970 کی دہائی میں حاصل تھی۔ یہاں اس بات سے بھی انکار نہیں کیا جاسکتا کہ وفاق میں وہی پارٹی حکومت بنانے کی پوزیشن میں ہوتی ہے جسے پنجاب میں خاطر خواہ نشتیں ملی ہوں۔
