پاکستان پیپلزپارٹی (پی پی پی) کے چیئرمین بلاول بھٹو زرداری نے کہا ہے کہ اقتدار میں آکر وفاق میں 17 بڑی وزارتیں بند کروں گا اور 300 ارب روپے عوام پر لگائے جائیں گے۔
چیئرمین پی پی پی نے نوابشاہ میں بختاور گرلز کیڈٹ کالج کی پاسٹ آؤٹ پریڈ سے خطاب کیا ہے۔
مزید پڑھیں
انہوں نے کہاکہ پیپلزپارٹی اقتدار میں آکر فرٹیلائزر، توانائی اور دیگر سیکٹرز کو دی جانے والی 1500 ارب روپے کی سبسڈی مزدوروں اور کسانوں تک براہِ راست پہنچائے گی۔
بلاول بھٹو نے کہاکہ پیپلزپارٹی کا مقابلہ مہنگائی اور غربت سے ہے، ہم اپنے نوجوان کو بااختیار بنانا چاہتے ہیں، کسان، مزدور اور نوجوان کارڈ دیں گے اور اس کے علاوہ غریب آدمی کو 300 یونٹ تک مفت بجلی دی جائے گی۔
انہوں نے کہاکہ ہماری حکومت آنے کے بعد اب واپڈا اور کے الیکٹرک کی ضرورت ہی نہیں پڑے گی، سولر اور ونڈ پاور منصوبے لگا کر اپنی بجلی خود پیدا کریں گے۔
بلاول بھٹو نے مزید کہاکہ آئندہ آنے والی حکومت کو 5 سال میں تنخواہیں دُگنی کرنا ہوں گی، پرانے سیاستدان اب ماضی کا قصہ بن چکے ہیں۔ ہم مل کر محنت کرتے ہوئے ملک کو ترقی کی راہ پر گامزن کریں گے۔