الیکشن کمیشن آف پاکستان نے عام انتخابات 2024ء میں عوام الناس کی سہولت کے لیے الیکشن مانیٹرنگ اینڈ کنٹرول سنٹر (ای ایم سی سی) قائم کر دیا ہے۔
الیکشن کمیشن کے ترجمان کے مطابق اس سینٹر میں عوام الناس کو الیکشن کے حوالے سے رابطہ کرنے اور اپنی شکایات درج کرانے کی سہولت ہو گی، اُن کی شکایت کے بروقت ازالہ کے لیے فوری طور پر کارروائی کی جائے گی، اس مقصد کے لیے سینٹر میں تربیت یافتہ عملہ بھی تعینات کردیا گیا ہے۔
ترجمان نے کہا ہے کہ الیکشن کمیشن نے عوام کی شکایات کے اندراج اور ان کے فوری حل کے لیے 4 سطحوں پر کنٹرول سینٹرز قائم کیے ہیں جن میں الیکشن کمیشن سیکریٹیریٹ اسلام آباد کے علاوہ صوبائی، ڈویژنل اور ضلعی سطح پر کنٹرول رومز قائم کیے ہیں۔
مزید پڑھیں
الیکشن کمیشن نے کہا ہے کہ عوام عام انتخابات کے سلسلے میں شکایت کے اندراج کے لیے ای ایم سی سی سینٹر کے عملہ سے ای میل [email protected] پر رابطہ کے علاہ اپنی شکایات واٹس ایپ نمبر 0327-5050610 پر بھی بھجوا سکتے ہیں۔
کمیشن نے عوام کی سہولت کے لیے ای ایم سی سی میں ایک مخصوص ہیلپ لائن کی سہولت بھی دی ہے جس کا رابطہ نمبر 111-327-000 ہے۔ ابتدائی طور پرای ایم سی سی صبح 8 بجے سے شام 6 بجے تک کام کرے گا تاہم وسط جنوری 2024ء سے پولنگ کے دن 8 فروری اور نتائج کے موصول ہونے تک یہ سینٹر 24 گھنٹے کام کرے گا۔ کنٹرول سنٹر میں سوشل میڈیا اور الیکٹرانک میڈیا کی مانیٹرنگ کی سہولت بھی موجود ہے۔ فیکس نمبر 051-9204403 کے ذریعے بھی شکایات بھیجی جا سکتی ہیں-
