دلکش مناظر، متحرک شہروں اور بھرپور ثقافت کا گڑھ انڈونیشیا سیاحوں کے لیے ایک جنت جیسا ہے اور اب تو حکومت وقت نے اپنی نئی ویزا پالیسی بھی متعارف کرادی ہے جس کے تحت آپ وہاں ایک وزٹ میں 2 مہینوں کے لیے سیر سپاٹے کر سکتے ہیں اور یہی نہیں بلکہ یہ سہولت ایک 5 سالہ ملٹیپل انٹری ویزے کی صورت میں حاصل ہوگی۔
انڈونیشیا کے ڈائریکٹوریٹ جنرل آف امیگریشن نے حال ہی میں ایک اہم ویزا پالیسی کا اعلان کیا ہے جس نے 5 سالہ متعدد داخلے کے اس ویزے کی شکل میں ملک میں سیاحت و کاروبار دونوں کو ایک نئے دور میں داخل کردیا ہے۔
اس ویزے کے تحت سیاح اپنے ہر چکر میں 2 ماہ تک انڈونیشیا میں رہتے ہوئے سیر و تفریح، دوستوں اور عزیزوں سے ملنے اور ثقافتی تقریبات میں شرکت جیسی سرگرمیوں سے لطف اندوز ہوسکیں گے۔
اس اقدام کا بنیادی مقصد انڈونیشیا میں کاروبار اور سیاحت دونوں سرگرمیوں کا ارادہ رکھنے والے غیر ملکیوں کے لیے سفر کی راہ ہموار کرنا ہے۔
[Indonesia visa Update] – Start issuing 05 year visa for Business and Tourism#visa #visaconsultants #visaservices #indonesiavisa #businessvisa #b2bvisaservices #visaapplication #attestation #attestationservices #visaprocessing #touristvisa #visaadvisor #visaconsultancy pic.twitter.com/yHgtkpPQHq
— Be There (@betheretravel13) December 27, 2023
ڈائریکٹر جنرل امیگریشن سلمی کریم نے نئی ویزا پالیسی کے مثبت اثرات کے بارے میں امید ظاہر کرتے ہوئے کہا ہے کہ یہ ملٹیپل انٹری ویزا غیر ملکیوں کے لیے اعلیٰ نقل و حرکت کے لیے ایک بڑی سہولت فراہم کرتا ہے۔ انہوں نے اس امید کا بھی اظہار کیا کہ اس نئی ویزا پالیسی کے نتیجے میں مزید غیر ملکی شہری انڈونیشیا کا دورہ کریں گے۔
مزید پڑھیں
انڈونیشیا کا 5 سالہ ملٹیپل انٹری ویزا
حال ہی میں شروع کیے گئے 5 سالہ ملٹیپل انٹری ویزے کے اجرا کی صورت میں سیاحت یا کاروباری مقاصد کے لیے ملک کی سیر کرنے کا ارادہ رکھنے والے غیر ملکیوں کے لیے فی وزٹ 60 دن تک رہنے کی اجازت ہوگی۔
انڈونیشیا کے لیے معیاری سیاحتی ویزا عام طور پر ایک ہی اندراج کے ساتھ 30 دن کے قیام کی اجازت دیتا ہے جبکہ اس کی میعاد ختم ہونے سے پہلے مزید 30 دن توسیع بھی کرائی جاسکتی ہے۔
ویزے کی اقسام ’ڈی 1‘ اور ’ڈی 2‘
مذکورہ ویزے کا اجرا جنوری 2024 سے ہوگا جس کے تحت غیر ملکیوں کے پاس یہ اختیار ہوگا کہ وہ 2 متعدد داخلے والے ویزوں کے درمیان کسی ایک کا انتخاب کرلیں۔ ان میں سے ہر ایک 5 سال کے لیے کارآمد ہوگا۔
ڈی 1 کے تحت سیر و تفریح کی اجازت ہوگی جبکہ ڈی 2 کاروباری مسافروں کے لیے ڈیزائن کیا گیا۔ ڈی 2 کے تحت مسافر ملک میں کہیں بھی میٹنگز، کانفرنسز، نمائشوں اور کاروباری مذاکرات میں حصہ لینے جیسی سرگرمیوں کے لیے فی دورہ 60 دن تک قیام کرسکیں گے۔ تاہم کل وقتی ملازمت یا تجارتی سرگرمیوں میں مشغول ہونے کی اجازت نہیں ہوگی جن کے لیے ورک پرمٹ کی ضرورت ہوتی ہے۔
درخواست دینا انتہائی آسان
اب انڈونشیا جانے کے خواہشمند افراد بوجھل درخواست فارم اور سفارت خانے کے چکر پر چکر کو بھول جائیں کیوں کہ اس 5 سالہ ملٹیپل انٹری (ڈی 1 اور ڈی 2) ویزوں کے لیے درخواست کو اب آن لائن پلیٹ فارم کے ذریعے آسان بنادیا گیا ہے۔
درخواست دہندگان آسانی سے فارم کو پُر کرسکتے ہیں، ضروری دستاویزات اپ لوڈ کرسکتے ہیں اور کریڈٹ کارڈ سے محفوظ ادائیگی کرسکتے ہیں۔ ہموار عمل ویزا کی مؤثر پروسیسنگ کو یقینی بناتا ہے جس سے درخواست دہندگان کے وقت اور محنت کی بچت ہوگی۔
کون سے دستاویزات درکار ہوں گے؟
ویزے کے لیے درخواست دہندہ کو مندرجہ ذیل دستاویزات کی ضرورت ہوگی۔
پاسپورٹ (کم از کم 6 ماہ کی میعاد کے ساتھ)۔
ذاتی بینک اسٹیٹمنٹ جو پچھلے 3 مہینوں میں کم از کم 2 ہزار امریکی ڈالر کا بیلنس ظاہر کرتا ہو۔
حالیہ رنگین تصویر۔
نئی ویزا پالیسی کے فوائد
آن لائن درخواست کا عمل ہموار اور ویزے کے تیز تر حصول میں سہولت فراہم کرتا ہے۔
فروغ سیاحت اور کاروبار۔
کیا آپ انڈونیشیا جانے کے لیے تیار ہیں؟
ڈی 1 اور ڈی 2 ویزوں کے متعارف ہونے کے بعد 17 ہزار جزائر کی سرزمین کی خوبصورتی اور تنوع سے محظوظ ہونا اس سے پہلے اتنا زیادہ آسان اور سہولتوں سے آراستہ نہیں تھا۔
انڈونیشیائی حکومت کا عزم ہے کہ ممکنہ مسافروں کی اس حد تک حوصلہ افزائی کی جائے گی کہ وہ بس ارادہ کریں، اپنا بیگ پیک کریں اور آن لائن ویزا حاصل کرکے روانہ ہوجائیں۔ اب آپ بتائیں آپ اپنا بیگ کب پیک کر رہے ہیں؟
