ایف آئی اے کمرشل بینکنگ سرکل کراچی نے کارروائی کرتے ہوئے جعلی امریکی ڈالرز کی خرید و فروخت میں ملوث ملزم کو گرفتار کرلیا، جبکہ مزید ملزمان کی گرفتاریوں کے لیے کارروائیاں جاری ہیں۔
ترجمان ایف آئی اے کے مطابق ڈائریکٹر ایف آئی اے کراچی زون زعیم اقبال شیخ کی ہدایت پر فراڈ میں ملوث ملزمان کی گرفتاری کے لیے کریک ڈاؤن جاری ہے، ڈپٹی ڈائریکٹر کمرشل بینکنگ سرکل کراچی علی مراد کی زیر نگرانی چھاپہ مار ٹیم نے کارروائی کر کے جعلی امریکی ڈالر کی فروخت میں ملوث ملزم عبداللہ کو کراچی سے گرفتار کر لیا۔
ایف آئی اے کے مطابق ملزم ڈالر کی فروخت کے لیے شہریوں سے پبلک مقامات پر ملاقات کرتا تھا اور سادہ لوح شہریوں کو کم قیمت کی آڑ میں جعلی ڈالر فروخت کرتا تھا۔
ملزم کے خلاف کارروائی متاثرین کی درخواست پر عمل میں لائی گئی اور اس کو کراچی سے گرفتار کرلیا گیا ہے، ملزم کے قبضے سے جعلی 1600 امریکی ڈالر برآمد کر لیے گئے ہیں۔
گرفتار ملزم سے تفتیش جاری ہے، دوران تفتیش ملزم کی جانب سے مزید انکشافات کیے جانے کا امکان ہے۔
