40 منٹ تک مردہ رہنے والی برطانوی خاتون نے موت سے قریب تر ہونے کا رونگٹے کھڑے کر دینے والے ہُوشربا انکشافات کیے ہیں۔
برطانوی میڈیا رپورٹس کے مطابق مستقبل سے لاعلم کرسٹی بورٹو فٹ نامی خاتون نے اپنے شوہر کے ہمراہ چھٹی کا منصوبہ بنایا تھا لیکن اگلے ہی لمحے اس نے خود کو دوسری دنیا میں پایا۔ 3 بچوں کی ماں کرسٹی کے شوہر نے حالت غیر ہونے پر اسے فوری اسپتال منتقل کیا جہاں ڈاکٹرز نے فوری طبی امداد فراہم کی لیکن بےسود ثابت ہوئی کیونکہ خاتون کوما میں چلی گئی تھی، مگر حیرت انگیز طور پر 40 منٹ تک کوما میں رہنے کے بعد معجزانہ طور پر واپس ہوش میں آگئی۔
خاتون کرسٹی بورٹو فٹ نے ہوش میں آنے کے بعد یہ دعویٰ کرکے سب کو حیران کر دیا کہ ان 40 منٹ میں اس نے ایک الگ دنیا کا تجربہ کیا ہے۔کرسٹی کے مطابق اس نے بےہوشی کے دوران دیکھا کہ اس کی جلد پر عجیب نشان نمودار ہوگئے، اپنے گھر کو دیکھا جہاں اس کے والدین اداس تھے، شوہر اور بچوں کی حالت بھی ٹھیک نہیں تھی، اس نے کوشش کی کہ ان سے دریافت کرسکے کہ وہ اداس کیوں ہیں لیکن اس کی ہمت نہیں ہوئی۔
مزید پڑھیں
کرسٹی نے مزید بتایا کہ پھر میں نے اپنے کچھ دوستوں کی آواز سنی، آواز کا تعاقب کرکے دوسرے کمرے میں دیکھا تو میرے دوست دریافت کر رہے ہیں کہ یہاں کیا ہو رہا ہے، جس پر میں نے انہیں بتایا کہ مجھے کچھ اچھا محسوس نہیں ہو رہا، جسم ٹوٹ رہا ہے اور اب لگتا ہے کہ یہ ممکن نہیں کہ میں واپس لوٹ سکوں جس پرانہوں نے سختی سے مجھے واپس لوٹنے کا کہا۔
کرسٹی بورٹو فٹ کے مطابق جب وہ ان تمام تجربات سے گزر رہی تھی تو ادھر اسپتال میں ڈاکٹروں نے میرے اہل خانہ کو جواب دے دیا تھا اور آخری رسومات کی تیاری کرنے کا کہہ دیا تھا کیونکہ میرے زندہ بچنے کی امید ختم ہوچکی تھی۔ تاہم کچھ ہی دیر میں معجزانہ طور پر مجھے ہوش آگیا، جس کے بعد میں مکمل طور پر خود کو صحتمند محسوس کر رہی ہوں جس پر ڈاکٹرز بھی حیران ہیں۔
