سابق گورنر پنجاب لطیف کھوسہ کے بیٹے خرم لطیف کھوسہ کو گرفتارکرلیا گیا۔ خرم کھوسہ کو تھانہ مزنگ لاہور میں درج شدہ ایف آئی آر میں گرفتار کیا گیا۔
پاکستان تحریک انصاف کے مرکزی رہنما اور سینیئر وکیل سردار لطیف کھوسہ کا کہنا ہے کہ ان کا بیٹا گزشتہ روز 4بجے سے لاپتہ تھا۔ اب پتہ چلا ہے کہ تھانہ مزنگ میں انہیں گرفتار کر لیا گیا ہے۔
انہوں نے بتایا کہ خرم لطیف کھوسہ کو ہائیکورٹ کے قریب آفس سے گرفتار کیا گیا، پی ٹی آئی سے تعلق کی وجہ سے خرم لطیف کھوسہ کو انتقامی کارروائی کے تحت جھوٹے مقدمے میں گرفتار کیا گیا ہے۔
دوسری جانب پولیس کا کہنا ہے کہ خرم لطیف کے خلاف تھانا مزنگ میں سب انسپکٹر کی مدعیت میں مقدمہ درج ہے۔ ایف آئی آر میں خرم لطیف کھوسہ پر کار سرکار مداخلت، پولیس یونیفارم پھاڑنے، سرکاری فائلیں چھیننے سمیت متعدد دیگر الزامات عائد کیے گئے ہیں۔
پولیس کے مطابق ایف آئی آر میں کہا گیا ہے کہ خرم لطیف کھوسہ نے 15 سے 20 وکلا کے ہمراہ پولیس اہلکاروں کو زدو کوب کیا، سنگین نتائج کی دھمکیاں دیتے ہوئے پولیس اہلکاروں پر حملہ آور بھی ہوئے۔
واضح رہے کہ گزشتہ دنوں سابق گورنر پنجاب اور سینیئر وکیل سردار لطیف کھوسہ پاکستان پیپلز پارٹی سے برسوں پرانا تعلق ختم کرتے ہوئے پاکستان تحریک انصاف میں شامل ہوگئے تھے۔
