گزشتہ 2023 پاکستان کے لیے ایک مشکل سال ثابت ہوا لیکن غیر ملکی سیاحت کے لیے یہ عرصہ خاصا بہتر رہا اور اس کے ذریعے زرمبادلہ میں بھی خاطر خواہ اضافہ ہوا۔
بیت جانے والے برس کے دوران پاکستان میں غیر ملکی سیاحت میں 115 فیصد اضافہ ہوا جس سے ملک کو 1.3 بلین ڈالر کا زرمبادلہ کمانے میں مدد ملی ہے۔ اقوام متحدہ کی عالمی سیاحتی تنظیم کے شائع کردہ ’ورلڈ ٹورازم بیرومیٹر‘ کے مطابق پاکستان نے سنہ 2023 میں وبائی امراض سے پہلے کی سطح پر 92 فیصد قابل ذکر بحالی کی ہے۔
اے پی پی کے مطابق زیر مملکت برائے سیاحت و وزیر اعظم کے معاون خصوصی برائے امور نوجوانان وصی شاہ نے امید ظاہر کی کہ سال 2024 سیاحت کے شعبے میں ایک پاور ہاؤس کے طور پر ملک کو تبدیل کرنے میں مزید سیاحتی سفری منظر نامے پر لائے گا۔
وصی شاہ نے کہا کہ پاکستان سیاحت کو فروغ دے رہا ہے اور سندھ و بلوچستان کے مزید غیر دریافت شدہ سیاحتی مقامات کی نشاندہی کی جائے گی جن میں ایڈونچر، مذہبی، فطرت، ویک اینڈ، دیہی اور قبائلی سیاحت شامل ہیں۔
وزیر مملکت وصی شاہ نے کہا کہ ہمارا ملک ساحلوں، چٹانوں، جنگلوں، پہاڑیوں، وادیوں اور دریاؤں اور قدرتی مناظر کی خوبصورتی سے مالا مال ہے۔
انہوں نے کہا کہ یہ جگہیں زیادہ تر غیر محفوظ ہیں اور یہ زیادہ تر غیر دریافت ہیں جہاں نئی منتخب حکومت کو توجہ مرکوز کرنے کی ضرورت ہے۔
ان کا کہنا تھا کہ ہم ڈبلیو ٹی ایم جیسی عالمی مارکیٹ کے شوز میں پاکستان کے سیاحت کے مواقع کی نمائش کر رہے ہیں جس سے زیادہ سے زیادہ سیاحوں کو پاکستان کی طرف راغب کرنے میں مدد ملے گی۔
وصی شاہ نے کہا کہ ورلڈ ٹورازم مارٹ میں شرکت کے ذریعے پاکستان پویلین میں سیاحت کے شوقین افراد، بین الاقوامی ٹریول کمپنیوں کے نمائندوں اور سوشل میڈیا پر اثر انداز ہونے والوں کی بڑی تعداد نے دلچسپی لی۔
انہوں نے مزید کہا کہ لندن میں ورلڈ ٹریول مارٹ دنیا کے سب سے بڑے ٹریول شوز میں سے ایک تھا جس نے دنیا بھر میں 5,000 سے زیادہ مشہور مقامات اور برانڈز کے ساتھ عالمی سفری خریداروں کو جوڑا۔
ایک سوال کے جواب میں انہوں نے کہا کہ یہ قوم کے لیے تحفہ ہے کہ پاکستان کو دنیا کا بہترین سیاحتی مقام قرار دیا گیا ہے۔ انہوں نے مزید کہا کہ حکومت طریقہ کار کو آسان بنا رہی ہے اور نجی شعبے کی حوصلہ افزائی اور شمولیت کو یقینی بنا رہی ہے۔
