وزیراعلیٰ پنجاب مریم نوازشریف کی قیادت میں کچے کے علاقوں میں چھ ہفتے کے کامیاب آپریشن کے بعد راجن پور اور رحیم یار خان کے جزیرہ نما علاقے ڈاکوؤں سے مکمل طور پر کلیئر کر دیے گئے ہیں۔
وزیراعلیٰ نے بتایا کہ راجن پور کے 42 اور رحیم یار خان کے 200 ڈاکوؤں نے ہتھیار ڈال دیے، جن میں ہائی پروفائل گینگ لیڈر بھی شامل تھے۔ 45 دن سے کچے کے علاقوں میں اغواء برائے تاوان اور ہنی ٹریپ کی کوئی کارروائی نہیں ہوئی، تقریباً 500 سے زائد مجرموں نے ریاست کے سامنے سرنڈر کیا اور دہشت کا ماحول ختم کیا گیا۔
یہ بھی پڑھیے: کچے کا پورا علاقہ زیر آب آنے کا خدشہ، تیاری مکمل کرلی، وزیراعلیٰ سندھ
مریم نوازشریف نے کہا کہ ڈاکوؤں نے خوف کی سلطنت قائم کر رکھی تھی اور ریاست کے اندر ریاست قائم کی ہوئی تھی، لیکن اللہ کے فضل و کرم سے اور ریاستی اداروں کی قربانیوں سے اب کچے کے علاقے ریاست کے کنٹرول میں آ گئے ہیں۔
انہوں نے پولیس، پاک فوج، رینجرز، سی سی ڈی، سپیشل برانچ اور دیگر سکیورٹی اداروں کو شاباش دی اور کہا کہ جدید ٹیکنالوجی، ڈرونز، نائٹ ویژن کیمرے اور انٹیلی جنس بیسڈ آپریشن کی وجہ سے یہ کامیابی ممکن ہوئی۔
وزیراعلیٰ پنجاب نے کچے کے علاقوں میں ترقیاتی اقدامات کا اعلان کرتے ہوئے کہا کہ یہاں سکول، کالج، ہسپتال اور ٹیکنیکل ایجوکیشن ادارے قائم کیے جائیں گے۔ بہتر ٹرانسپورٹ کے لیے گرین بس سروس اور دیگر سہولتیں فراہم کی جائیں گی۔ کچے کے لوگوں کو اپنا کھیت اور اپنا روزگار کے تحت زرعی اراضی اور کسان کارڈ بھی فراہم کیے جائیں گے۔
یہ بھی پڑھیے: شکارپور میں امن کی بحالی، 71 ڈاکوؤں کا سرینڈر، 209 ہتھیار پولیس کے حوالے
مزید برآں، روزگار کے مواقع بڑھانے کے لیے ٹیکنیکل ایجوکیشن سینٹر قائم کیے جائیں گے، اور ڈاکٹرز و ٹیچرز کو سپیشل الاؤنس اور مراعات دی جائیں گی۔ کچے کے علاقے کے لیے خصوصی پیکیج اور اضافی مراعات بھی فراہم کی جائیں گی تاکہ مقامی لوگ اپنے صوبے پر فخر محسوس کریں۔
وزیراعلیٰ نے کہا کہ چیف سیکریٹری زاہد اختر زمان، سابق آئی جی ڈاکٹر عثمان انور، آئی جی راؤ عبدالکریم اور آئی جی ساؤتھ کامران خان کی قیادت میں ریاستی اداروں نے بے مثال قربانی دی۔ انہوں نے اس بات پر زور دیا کہ سرنڈر کرنے والے ڈاکوؤں کے خلاف قانون کے مطابق فیئر ٹرائل ہوگا۔
مریم نوازشریف نے آخر میں کہا کہ اللہ کے فضل سے کچے کے علاقے میں ریاست کی رٹ بحال ہو گئی ہے اور اب مقامی لوگوں کو ترقی اور وسائل فراہم کر کے ان کی زندگی بہتر بنائی جائے گی۔
