ایف آئی اے انٹرپول کی کارروائی، قتل کے مقدمے میں مطلوب ملزم سعودی عرب سے گرفتار

ایف آئی اے انٹرپول نے بڑی کارروائی کرتے ہوئے قتل کے مقدمے میں مطلوب اشتہاری ملزم کو سعودی عرب سے گرفتار کر لیا ہے۔

ترجمان ایف آئی اے کے مطابق سنگین جرائم میں مطلوب اشتہاری ملزم کو سعودی عرب سے گرفتار کر کے اسلام آباد ایئرپورٹ منتقل کر دیا گیا۔

ترجمان کے مطابق گرفتار ملزم فاضل بخش پنجاب کی ڈیرہ غازی خان پولیس کو مطلوب تھا اور اس کے خلاف قتل کی دفعات کے تحت مقدمہ درج تھا۔

ترجمان نے مزید بتایا کہ ایف آئی اے انٹرپول پاکستان نے ملزم کی گرفتاری کے لیے ریڈ نوٹس جاری کیا تھا۔ بعد ازاں ایف آئی اے امیگریشن اسلام آباد نے ملزم کو متعلقہ پولیس حکام کے حوالے کر دیا۔

ترجمان کے مطابق ملزم کی حوالگی انٹرپول اسلام آباد کی انٹرپول ریاض کے ساتھ قریبی رابطہ کاری کی وجہ سے ممکن ہوئی۔

ترجمان نے بتایا کہ انٹرپول پاکستان بیرون ملک فرار ہونے والے ملزمان کی گرفتاری کے لیے گراں قدر خدمات سرانجام دے رہا ہے، اور انتہائی مطلوب ملزمان کی گرفتاری اور بروقت حوالگی کے لیے ہمہ وقت کوشاں ہے۔