اولاد کے معاملے میں جہاں پاکستانی معاشرے میں بیٹوں کو ترجیح دی جاتی ہے وہیں اگر کسی شادی شدہ جوڑے کے ہاں بیٹے کی پیدائش نہ ہو تو شوہر کو دوسری شادی کے مشوروں سے بھی نوازا جانے لگتا ہے۔
ضلع خیبر کے رہائشی بسم اللہ خان کو بھی 8 بیٹیاں ہونے کے بعد ایسے ہی مشورے دیے جاتے رہے لیکن ان کے مطابق وہ کبھی ان مشوروں کوخاطر میں نہیں لائے۔
والدین نے جب پوتے کی خاطر ان پر دباؤ بڑھایا تو انہوں نے کہا کہ ’آپ لکھ کر دیں کہ دوسری شادی سے بیٹا پیدا ہوگا تو میں یہ کام کر لیتا ہوں‘۔
وی نیوز سے گفتگو کرتے ہوئے بسم اللہ خان نے بتایا کہ سنہ 2021 میں جب ان کی اہلیہ کی وفات ہوئی تو پھر انہوں نے دوسری شادی کرلی۔ اب انہیں 70 سال کی عمر میں 8 بیٹیوں کے بعد اللہ تعالیٰ نے بیٹے سے نوازا ہے۔
ان کا کہنا تھا کہ انہیں بیٹے کی پیدائش کی اطلاع ان کی بیٹی نے دی اور جیسے ہی انہیں یہ پتا چلا تو انہوں نے شکرانے کے 2 نفل ادا کیے۔
