توہین الیکشن کمیشن کیس میں بانی چیئرمین پی ٹی آئی عمران خان اور سابق وزیر اطلاعات و نشریات فواد چوہدری پر فرد جرم عائد کر دی گئی ہے۔
ممبر الیکشن کمیشن نثار درانی کی سربراہی میں الیکشن کمیشن کے چار رکنی بینچ نے اڈیالہ جیل راولپنڈی میں سابق وزیراعظم عمران خان اور سابق وفاقی وزیر فواد چوہدری کے خلاف توہین الیکشن کمیشن کیس کی سماعت کی۔
الیکشن کمیشن کے 4 رکنی بینچ نے عمران خان اور فواد چوہدری پر فرد جرم عائد کردی، دونوں ملزمان کو فردجرم پڑھ کر سنائی گئی اور کیس کی مزید سماعت 16 جنوری تک ملتوی کردی گئی ہے۔
واضح رہے کہ بانی چیئرمین پی ٹی آئی عمران خان کے چیف الیکشن کمشنر سکندر سلطان راجہ پر الزامات کے بعد الیکشن کمیشن کے چار رکنی بینچ نے ان کو توہین الیکشن کمیشن کا نوٹس جاری کیا تھا۔