بھارت اور جنوبی افریقہ کی ٹیموں کے درمیان کیپ ٹاؤن میں جاری فریڈم ٹرافی کے دوسرے کرکٹ ٹیسٹ میں جنوبی افریقی بولرز نے بغیر کوئی رن دیے بھارت کی 6 وکٹیں اڑا کر ٹیسٹ کرکٹ کی نئی تاریخ رقم کردی ۔ ٹیسٹ کرکٹ کی تاریخ میں یہ پہلا موقع ہے کہ کسی ٹیم نے بغیر کسی رن کے اضافے کے 6 وکٹیں گنوائیں ہوں ۔
کیپ ٹاؤن ٹیسٹ میں جنوبی افریقہ کی ٹیم 55 رنز پر ڈھیر ہوگئی تھی جس کے بعد ایک موقع پر بھارت نے چار وکٹ پر 153 رنز بنالیے تھے لیکن پھر جنوبی افریقی بولرز نے پانسہ پلٹا۔
پہلے لونگی نگیڈی نے ایک اوور میں کے ایل راہول، راویندرا جدیجا اور جسپریت بمرا کو آؤٹ کیا اور اگلے اوور میں رباڈا نے ویرات کوہلی کو آؤٹ کر دیا ، پھر سراج رن آؤٹ ہوئے اور اس کے بعد پراسید کرشنا بھی رباڈا کا شکار ہوگئے ۔
یوں بھارت کی ٹیم بغیر کسی رن کا اضافہ کیے 6 کھلاڑیوں سے محروم ہوگئی اور پوری ٹیم 153 پر ہی آل آؤٹ ہوگئی۔
The first time six wickets have fallen on the same score in a Test innings 😱 #SAvIND pic.twitter.com/eUmkYMJa9p
— ESPNcricinfo (@ESPNcricinfo) January 3, 2024
اس سے قبل ٹیسٹ کرکٹ میں 4 مرتبہ ایسے لمحات آئے جب ایک ٹیم بغیر کوئی رن کے اضافے پر 5کھلاڑیوں سے محروم ہوگئی ہو ۔ ان 4 میں سے 3 مرتبہ بیٹنگ سائیڈ نیوزی لینڈ کی رہی ۔
1946 میں آسٹریلیا کے خلاف، 1965 میں پاکستان کے خلاف اور 2012 میں جنوبی افریقہ کے خلاف نیوزی لینڈ کی ٹیم بغیر کوئی رن کے اضافے کے 5 کھلاڑیوں سے محروم ہوگئی تھی ۔
لیکن اب یہ ناپسندیدہ ترین ریکارڈ کا دھبہ بھارتی ٹیم پر لگ گیا ہے جو بغیر کسی رن کے اضافے پر 6 وکٹیں گنوا بیٹھی۔
اس میچ میں ٹیسٹ کی تاریخ میں پہلی بار اننگز میں 7 کھلاڑی بغیر کوئی رنز بنائے پویلین لوٹے، بھارت کے 6 کھلاڑی صفر پر آؤٹ ہوئےجبکہ ایک کھلاڑی بغیر رن بنائے 0 پر ناٹ آؤٹ رہا۔
