نیشنل کمانڈ اینڈ اپریشن سینٹر نے بیرون ملک سے پاکستان آنے والے مسافروں کے کوروناٹیسٹ دوبارہ شروع کرنے کا فیصلہ کیا ہے۔
جمعرات کے روز اسلام آباد میں نیشنل کمانڈ اینڈ اپریشن سینٹر(NCOC) کے اجلاس میں کورونا کے نئے ویرینٹ جے این ون(JN1) پر غور کیا گیا۔
اجلاس میں ملک بھر کے ہوائی اڈوں پر بیرون ملک سے آنے والے مسافروں کا کورونا ٹیسٹ کرنے کا عمل دوبارہ شروع کرنے کی منظوری دے دی گئی ہے۔
این سی او سی کے مطابق پاکستان میں اب تک کوویڈ کے نئے ویرینٹ جے این ون کا کوئی کیس رپورٹ نہیں ہوا تاہم بیرون ملک سے آنے والے مسافروں کا کورونا ٹیسٹ کیا جائے گا تاکہ کسی مسافر کے ذریعے کورونا کا نیا ویرینٹ نہ پھیل سکے۔
یاد رہے کہ نیشنل کورونا کمانڈ اینڈ آپریشن سینٹر نے مارچ 2022 میں اعلان کیا تھا کہ ملک کورونا فری ہونے کے قریب پہنچ گیا ہے جس کے پیش نظر تمام پابندیاں ختم کردی گئی ہیں۔
یہاں یہ بات بھی قابل ذکر ہے کہ سال 2024ء میں حج کے لیے کورونا ویکسین کی شرط ختم کردی گئی ہے،وزارت مذہبی امور کے مطابق حج 2024ء کے لیے عازمین حج کو کورونا سرٹیفکیٹ جمع کرانے کی ضرورت نہیں ہے۔
