الیکشن کمیشن کے زیر اہتمام عام انتخابات 2024 کے لیے انتخابی عملے کی ترجیحی بنیادوں پرشروع کیے گئے تربیتی سلسلہ میں اب تک 5لاکھ79 ہزار191 افراد کی ضروری تربیت مکمل ہو چکی ہے جبکہ بقیہ 4 لاکھ 6 ہزار 222 افراد کی تربیت یکم فروری2024 تک مکمل ہو جائے گی۔
الیکشن کمیشن آف پاکستان کی جانب سے جاری پریس ریلیز کے مطابق الیکشن کمیشن نے عام انتخابات میں تعینات ہونے والے 9 لاکھ 85 ہزار 413 نفوس پر مشتمل انتخابی عملہ کی تربیت کا آغاز نومبر2023ء کے آخری ہفتہ میں کیا۔
مزید پڑھیں
پریس ریلیز میں کہا گیا ہے کہ انتخابی عملہ میں ڈسٹرکٹ ریٹرننگ افسران، ریٹرننگ افسران، پریذائیڈنگ افسران، اسسٹنٹ پریذائیڈنگ افسران اور دیگر انتخابی عملہ شامل ہے۔
پریس ریلیز میں بتایا گیا ہے کہ تربیتی پروگرام کے دوران غیر حاضر رہنے والے عملہ کے خلاف سخت تادیبی کارروائی عمل میں لائی جا رہی ہے۔ لہٰذا عام انتخابات کے دوران انتخابی ذمہ داریاں تفویض کیے جانے والے تمام سرکاری ملازمین کو تربیتی نشستوں میں اپنی حاضری یقینی بنانے کی ہدایت کی گئی ہے۔
علاوہ ازیں الیکشن کمیشن کی خصوصی ہدایات پر مرکزی کنٹرول روم 26 دسمبر 2023 سے مکمل فعال ہے اور روزانہ کی بنیادوں پر موصولہ شکایات کا ازالہ کر رہا ہے۔
بیان میں بتایا گیا ہے کہ مرکزی کنٹرول روم میں اب تک 45 شکایات موصول ہوئیں اور ان تمام کا ازالہ کیا جا چکا ہے۔اس کے ساتھ ساتھ الیکشن کمیشن سیکرٹریٹ میں قائم مرکزی شکایت سیل میں آنے والی 165 شکایات پر فوری کارروائی کرتے ہوئے متعلقہ حکام کو ضروری ہدایات جاری کی گئیں اور تمام شکایات کا ازالہ ہو چکا ہے۔
مرکزی کنٹرول روم کے ما تحت 180 کنٹرول روم صوبائی، ڈویژنل اور ضلعی سطح پر بھی فعال کر دیے گئے ہیں جو انتخابات کی نگرانی اور شکایات کے فوری ازالے کے لیے مرکزی کنٹرول روم کی معاونت کر رہے ہیں۔
ملک بھر کے تمام اضلاع میں تعینات مانیٹرنگ ٹیمیں بھی متحرک ہو گئی ہیں جو امیدواران کی جانب سے ضابطہ اخلاق کی خلاف ورزی کرنے والے تمام تشہیری مواد کو روزانہ کی بنیادوں پر ہٹانے میں مصروف ہیں۔
اب تک ضابطہ اخلاق کی دیگر خلاف ورزیوں پر ڈسٹرکٹ مانیٹرنگ آفیسرز کی جانب سے نوٹسز بھی جاری کیے جارہے ہیں جن پر انکوائری کے بعد قانون کے مطابق کارروائی عمل میں لائی جائے گی۔
