خیبر ختونخوا کے ضلع کوہاٹ میں پولیس چیک پوسٹ پردہشتگردوں کے حملے میں 3 پولیس اہلکاروں سمیت 4 افراد ہلاک ہو گئے ہیں۔
کوہاٹ پولیس کے مطابق رات گئے کوہاٹ ٹول پلازہ اور چیک پوسٹ پر دہشتگردوں نے اچانک حملہ کر دیا، انڈس ہائی وے پر واقع لاچی ٹول پلازہ اور چیک پوسٹ پر حملے میں دہشتگردوں کی تعداد 10 سے زائد تھی۔
پولیس ذرائع کے مطابق فائرنگ کی زد میں آکر ایک شہری بھی جان کی بازی ہار گیا، جس کا تعلق ضلع لکی مروت سے بتایا جاتا ہے۔
پولیس کے مطابق دہشتگرد حملے میں شہید ہونے والے پولیس اہلکاروں میں ہیڈ کانسٹیبل امجد، ہیڈ کانسٹیبل جنید اور کانسٹیبل وقارشامل ہیں۔
واقعے کی اطلاع پر پولیس اور فوج کی بھاری نفری جائے وقوعہ پر پہنچ گئی، علاقے کو گھیرے میں لیکر حملہ آوروں کی تلاش میں سرچ آپریشن شروع کردیا گیا ہے۔
پولیس کا کہنا ہے کہ حملے کے بعد دہشتگرد رات کی تاریکی میں فرار ہونے میں کامیاب ہو گئے تھے، جا کی تلاش کے لئے سرچ آپریشن تاحال جاری ہے۔
