تحریک انصاف کے رہنما بیرسٹر گوہر خان کے گھر مبینہ پولیس چھاپے کی شکایت پر کیپیٹل سٹی پولیس آفیسر ڈاکٹر اکبر ناصر خان نے واقعہ کی انکوائری رپورٹ کا حکم دیتے ہوئے ایس ایچ او مارگلہ پولیس اسٹیشن سمیت 5 پولیس افسروں کو تاحکم ثانی معطل کردیا ہے۔
انکوائری کے معاملے پر ترجمان اسلام آباد پولیس نے اپنے بیان میں بتایا ہے کہ 13 جنوری کو پولیس ایک مخبر کی اطلاع پر اشتہاری کی تلاش میں دارالحکومت کے رہائشی سیکٹر ایف سیون ٹو پہنچی تھی تاہم وہ گھر بیرسٹر گوہر کا ہے معلوم ہونے پر پولیس فوری واپس آگئی تھی۔
ترجمان اسلام آباد پولیس کے مطابق بیرسٹر گوہر نے سپریم کورٹ میں اپنے گھر پولیس جانے کی شکایت کی، جس پر چیف جسٹس پاکستان نے اسلام آباد کیپیٹل سٹی پولیس آفیسر کو طلب کرکے معاملے کی تحقیق کا حکم دیا تھا۔
پولیس ترجمان کے مطابق سپریم کورٹ نے آئی سی سی پی او کو ذاتی طور پر چئیرمن پی ٹی آئی کی شکایت کو سننے کا کہا جس پر آئی سی سی پی او ڈاکٹر اکبر ناصر خان نے بیرسٹر گوہر خان کو تحقیق کی یقین دہانی کروائی تھی۔
بیرسٹر گوہر کے گھر مقامی پولیس جانے پر انکوائری ۔
13 جنوری بوقت سہ پہر مقامی پولیس ایک مخبر کی اطلاع پر اشتہاری کی تلاش میں F-7/2 پہنچی۔مذکورہ گھر بیرسٹر گوہر کا ہے معلوم ہونے پر پولیس فوری واپس آگئی،بیرسٹر گوہر نے سپریم کورٹ میں اپنے گھر پولیس جانے کی شکایت کی۔
چیف جسٹس آف…
— Islamabad Police (@ICT_Police) January 14, 2024
اسلام آباد کیپیٹل سٹی پولیس آفیسر نے کسی بھی پولیس افسر کے قصور وار ہونے پر کارروائی کی یقین دہانی کراتے ہوئے ڈی پی او سٹی کو انکوائری افسر مقرر کر کے تفصیلی رپورٹ 3 دن میں طلب کرلی ہے۔
پولیس ترجمان کے مطابق 5 افسران بشمول ایس ایچ او مارگلہ کو تاحکم ثانی معطل کردیا گیا ہے۔ ‘انکوائری عمل میں لائی جا رہی ہے اور قانون کی خلاف ورزی کرنے والے اہلکاروں کے خلاف سخت کارروائی عمل میں لائی جائے گی۔‘
