کیا آزاد امیدوار کی حیثیت سے کارکن پی ٹی آئی کے ساتھ وفا کر پائیں گے؟

سپریم کورٹ آف پاکستان نے ہفتہ کے روز پاکستان تحریک انصاف( پی ٹی آئی ) کے خلاف الیکشن کمیشن کا فیصلہ برقرار رکھتے ہوئے ’بلے‘ کے نشان سے محروم کر دیا جس کے بعد پی ٹی آئی کے اُمیدواروں کو آزاد حیثیت میں نئے انتخابی نشان جاری کر دیے گئے ہیں۔

پی ٹی آئی کے امیدوار وں کی حیثیت آزاد ہو گئی

پاکستان تحریک انصاف (پی ٹی آئی ) کے تمام امیدوار اب آزادانہ حثیت سے انتخابات میں حصہ لیں گے، جو کہ پی ٹی آئی کی فتح میں ایک بڑی رکاوٹ بن سکتی ہے، کیونکہ تاریخ میں یہ دیکھا گیا ہے، بہت سے آزاد امیدوار آزاد حثیت سے جیتنے کے بعد دوسری پارٹیوں میں شمولیت اختیا کر لیتے ہیں۔

کیا انتخابی امیدوار پارٹی سے وفا کر پائیں گے

سپریم کورٹ کے فیصلے کے بعد بڑا سوال یہ پیدا ہوتا ہے کہ اس اثنا میں کیا پی ٹی آئی کے امیدوار جیتنے کے بعد پارٹی کے ساتھ وفا کر پائیں گے؟۔

وہی امیدوار چنیں گے جو پارٹی سے وفادار رہیں گے، رؤف حسن

اس حوالے سے وی نیوز سے گفتگو کرتے ہوئے پی ٹی آئی کے سیکریٹری اطلاعات رؤف حسن نے کہا کہ پاکستان تحریک انصاف کے جتنے بھی امیدوار ہوں گے وہ آخر تک پارٹی کے ساتھ کھڑے رہیں گے، کیونکہ ہم امیدوار وہی چنیں گے جو جیتنے کے بعد بھی پارٹی کے ساتھ وفاداری کے ساتھ رہیں گے۔

فتح پی ٹی آئی ہی کی ہو گی

انہوں نے مزید کہا کہ ہم منتخب ہی ان لوگوں کو کریں گے جو ہر طرح سے پی ٹی آئی کے معیار کے مطابق پورا اترتے ہیں اور پارٹی کے لیے مضبوط اُمیدوار ثابت ہوں گے، ان شا اللہ پی ٹی آئی ہی فتح حاصل کرےگی۔

بلا چھن جانے کے بعد پی ٹی آئی کو بہت نقصان ہو گا لیکن ختم نہیں ہو گی، نصرت جاوید

سیاسی تجزیہ کار اور کالم نگار نصرت جاوید نے وی نیوز سے بات کرتے ہوئے کہا کہ اس بار بھی 2018 والی تاریخ دہرائی جا سکتی ہے، کیونکہ جب بھی آزاد امیدوار جیت جاتے ہیں، ان کی کوشش ہوتی ہے کہ وہ نہ صرف اپنے مفادات بلکہ لوگوں کو نوکریاں دلوانے اور اپنے حلقے کے لیے کام کروانے کے لیے حکومتی جماعتوں کے ساتھ شمولیت اختیار کر لیتے ہیں۔

انہوں نے مزید کہا کہ یقیناً بلے چھن جانے کے بعد پی ٹی آئی کو بہت نقصان ہوگا، لیکن ایسا ماضی میں بھی ہوتا رہا ہے، مگر پارٹیاں ختم نہیں ہوتیں نہ ہی پی ٹی آئی ختم ہوگی۔

اچھا برا وقت سب پر آتا ہے

ان کا کہنا تھا کہ البتہ صوبائی اور قومی اسمبلی میں پی ٹی آئی محدود ہو جائے گی، مگر وقت کے ساتھ پی ٹی آئی پھر ابھر آئے گی کیونکہ یہ وقت پیپلز پارٹی اور مسلم لیگ (ن) بھی دیکھ چکی ہے۔ لیکن پارٹیاں ختم نہیں ہوئیں اور سیاست بھی یہی ہے۔ اچھا برا وقت سب پر آتا ہے۔

کسی بھی پارٹی کو انتخابی نشان سے محروم کر دینا انتہائی غلط ہے، سہیل وڑائچ

تجزیہ کار سہیل وڑائچ نے وی نیوز سے بات کرتے ہوئے کہا کہ ایک پارٹی سے اس کا انتخابی نشان لے لینا، کوئی ٹھیک بات نہیں ہے کیونکہ اس سے آئین کے بنیادی حقوق متاثر ہوئے ہیں۔

ان کا مزید کہنا تھا کہ ماضی میں پیپلز پارٹی سے تلوار کا نشان لے کر تیر کا دے دیا گیا تھا، عام انتخابات میں پارٹی کو انتخابی نشان سے محروم کر دینا انتہائی غلط ہے۔

ایک سوال کے جواب میں انہوں نے کہا کہ جیتنے والے تمام امیدوار پارٹی کے نام پر ووٹ لیتے ہیں اور پھر دوسری جماعتوں میں شمولیت اختیار کر لیتے ہیں،جو کہ ایک بہت ہی غلط روایت ہے۔

لگتا ہے 1985 والی اسمبلی بننے جا رہی ہے

انہوں نے کہا کہ تمام امیدواروں کو پارٹی کے ساتھ کھڑا رہنا چاہیے، کیونکہ ماضی میں آزاد امیدواروں نے پیپلز پارٹی کے نام پر ووٹ لیے اور پھر دوسری جماعتوں میں چلے گئے۔ ایسا لگ رہا ہے کہ ایک بار پھر 1985 والی اسمبلی بننے جا رہی ہے۔

پاکستان تحریک انصاف (پی ٹی آئی )کے مستقبل کے حوالے سے انہوں نے بات کرتے ہوئے کہا کہ جب تک عمران خان زندہ ہے پی ٹی آئی بھی رہے گی اور اس کا ووٹ بینک بھی موجود رہے گا۔پارٹی اگر منظم رہی تو پی ٹی آئی کے لیے اتنا ہی کافی ہوگا۔