الیکشن کمیشن نے ملک بھر میں 8 فروری 2024 کو شیڈیول عام انتخابات کے لیے انتخابی نشانات کے حوالے سے کہا ہے کہ آزاد امیدواروں میں سے جسے جو انتخابی نشان مل گیا، وہ اب تبدیل نہیں ہوسکے گا۔
الیکشن کمیشن آف پاکستان نے تمام صوبائی الیکشن کمشنرز، ڈسٹرکٹ ریٹرننگ آفیسرز، اور ریٹرننگ آفیسرز کو حکم جاری کیا ہے کہ عام انتخابات کے لیے انتخابی نشان جاری کیے جا چکے ہیں، بیلٹ پیپرز کی چھپائی کا عمل شروع ہوچکا ہے، اس لیے انتخابی نشانات کی تبدیلی ممکن نہیں ہوسکے گی۔
مزید پڑھیں
ترجمان الیکشن کمیشن کے مطابق اگر انتخابی نشان میں کوئی تبدیلی لازمی درکار ہو تو پہلے الیکشن کمیشن سے اجازت لی جائے، تاہم اس مرحلے پر تبدیلی کے امکانات ناممکن ہیں۔
یاد رہے کہ سیاسی جماعتوں کے لیے 146، آزاد امیدواروں کے لیے 177 نشان مختص ہیں۔ بیلٹ پیپرز کی چھپائی کے لیے کوائف پرنٹنگ کارپوریشن کو بھجوا دیے گئے ہیں۔ بیلٹ پیپرز کی چھپائی کے لے ساڑھے 18 ہزار کوائف پرنٹنگ کارپوریشن کو ارسال کیے گئے ہیں۔ بیلٹ پیپرز کی پرنٹنگ شروع ہو چکی ہے، لہٰذاآزاد امیدوار اب انتخابی نشان تبدیل نہیں کرواسکیں گے۔
