ایف آئی اے اینٹی ہیومن ٹریفکنگ سرکل کراچی نے کارروائی کے دوران غیرقانونی کرنسی ایکسچینج میں ملوث گینگ کے 2 ملزمان کو گرفتار کرکے ہزاروں امریکی ڈالرز بھی برآمد کیے ہیں۔
ڈائریکٹر ایف آئی اے کراچی زون زعیم اقبال شیخ کی ہدایت پر حوالہ ہنڈی اور غیر قانونی کرنسی ایکسچینج میں ملوث عناصر کے خلاف جاری کریک ڈاؤن کے دوران ایف آئی اے اینٹی ہیومن ٹریفکنگ سرکل کراچی نے کارروائی کے دوران غیر قانونی کرنسی ایکسچینج میں ملوث گینگ کے 2 ملزمان کو گرفتار کرلیا ہے۔
ترجمان ایف آئی اے کے مطابق ڈپٹی ڈائریکٹر اینٹی ہیومن ٹریفکنگ سرکل کراچی ایاز مہر کی زیر نگرانی چھاپہ مار کارروائی کے دوران غیر قانونی کرنسی ایکسچینج میں ملوث گینگ کے 2 ملزمان کو گرفتار کرکے ان کی ملکیت سے لاکھوں مالیت کی غیر ملکی کرنسی برآمد کر لی گئی ہے۔
ملزمان محمد جاوید اور یاسین کو سول ہسپتال کراچی کے قریب سے گرفتار کیا گیا ہے، ملزمان حوالہ ہنڈی اور کرنسی کی غیر قانونی ایکسچینج میں ملوث تھے، گرفتار ملزمان بغیر لائسنس غیر ملکی کرنسی ایکسچینج میں بھی ملوث تھے۔
ترجمان ایف آئی اے کے مطابق چھاپے کے دوران ملزمان سے مجموعی طور پر 22500 امریکی ڈالر سمیت موبائل فونز اور ہنڈی حوالہ سے متعلق پیغامات، ہنڈی حوالہ کے رجسٹرز بھی برآمد کر لیے گئے ہیں، ملزمان برآمد ہونے والی کرنسی کے حوالے سے حکام کو مطمئن نہ کر سکے۔
ایف آئی اے حکام نے ملزمان کو گرفتار کر کے تفتیش کا آغاز کر دیا ہے جبکہ دیگر ملزمان کی گرفتاری کے لئے چھاپے مارے جا رہے ہیں۔
