پاکستان نے آئی سی سی انڈر 19 کرکٹ ورلڈ کپ کے پہلے لیگ میچ میں افغانستان کو 181 رنز سے شکست دے دی۔ جنوبی افریقہ کے شہر ایسٹ لندن میں پاکستان نے ٹاس جیت کر پہلے بیٹنگ کا فیصلہ کیا جو درست ثابت ہوا اور 9 وکٹوں کے نقصان پر 284 رنز بنائے۔
پاکستان کی جانب سے شاہ زیب خان نے عمدہ بیٹنگ کرتے ہوئے 10 چوکوں اور 3 چھکوں کی مدد سے 106 رنز بنائے جبکہ کپتان سعد بیگ نے 4 چھکوں اور 3 چوکوں کی بدولت 55 رنز کی ناقابل شکست باری کھیلی۔ ریاض اللہ 46 رنز بنا کر نمایاں رہے۔ افغانستان کی جانب سے خلیل احمد نے 4 وکٹیں لیں۔
ہدف کے تعاقب میں عبید شاہ اور ذیشان کی عمدہ باؤلنگ کے سبب افغانستان کی پوری ٹیم صرف 103 رنز پر ڈھیر ہوگئی، افغان بلے باز نعمان شاہ 26 رنز بنا کر سب سے نمایاں کھلاڑی رہے۔ عبید نے 4 جبکہ ذیشان نے 3 وکٹیں لیں۔ شاہ زیب کو ان کی شاندار سینچری پر میچ کا بہترین کھلاڑی قرار دیا گیا۔
واضح رہے کہ انگلینڈ میں کھیلے جا رہے انڈر 19 آئی سی سی کرکٹ ورلڈ کپ میں 16 ٹیمیں شریک ہیں، 4 گروپس میں 4، 4 ٹیمیں شامل ہیں۔ پاکستان کو گروپ ڈی میں رکھا گیا ہے، جس میں نیپال، نیوزی لینڈ اور افغانستان شامل ہیں۔
