پشاور میں صدر بازار میں واقع موبائل پلازہ میں رات گئے لگی آگ پر ابھی تک قابو نہیں پایا جاسکا ہے، ریسکیو حکام کے مطابق پلازہ میں شارٹ سرکٹ آگ کا باعث بنا، فوری طور پر کسی جانی نقصان کی اطلاع نہیں ملی۔
ترجمان ریسکیو 1122 نے بتایا کہ ٹائم اسکوائر پلازہ میں آگ لگنے کی اطلاع رات 2 بجے کے قریب موصول ہوئی۔ جس کے فوراً بعد ریسکیو اور فائرفائٹر کی ٹیمیں موقع پر پہنچ گئیں، آگ لگنے کے بعد 4 دکاندار سامان نکالنے کے لیے پلازے میں جانے کے بعد پھنس گئے تھے جنہیں باحفاظت نکال لیا گیا ہے۔
ترجمان ریسکیو 1122 کے مطابق آگ کی شدت کو مد نظر رکھتے ہوئے مردان، نوشہرہ، چارسدہ اور ضلع خیبر سے بھی ریسکیو ٹیمیں پہنچ گئی ہیں۔ ‘اس وقت 130 سے زیادہ فائرفائٹرز بمعہ 26 فائروہیکلز، 4 واٹر باؤزرز آگ بجھانے کے عمل میں مصروف ہیں، 4 ایمبولینسز بھی موقع پر موجود ہیں۔‘
متاثرہ پلازہ میں موبائل فون، یو پی ایس اور دیگر الیکٹرونکس کی دکانیں ہیں، ریسکیو ترجمان کے مطابق آگ کی شدت بڑھ رہی ہے جس کی وجہ موبائل مارکیٹ کی دکانوں میں موجود بیٹریوں اور یو پی ایس کا پھٹنا ہے۔ مصروف اور گنجان آباد علاقے میں آگ لگنے کے باعث اردگرد کی آبادی بھی متاثر ہو رہی ہے، تاہم موبائل مارکیٹ کے عقب اور قریب میں واقع گھروں سے رہائشیوں کو بحفاظت نکال لیا گیا ہے۔
70 فیصد آگ پر قابو پا لیا گیا
موبائل مارکیٹ پلازہ میں لگی آگ بجھانے کا عمل جاری ہے۔ ریسکیو حکام کے مطابق 70 فیصد آگ پر قابو پا لیا گیا ہے۔ جبکہ ریسکیو کے تازہ دم فائر فائٹرز بھی پہنچ گئے ہیں اور آگ بجھانے میں مصروف ہیں۔ ‘آگ کی شدت کم ہوچکی ہے-دھواں زیادہ ہے جس کو نکالا جارہا ہے جبکہ مخلتف دکانوں میں بیٹریاں پھٹنے کی وجہ سے آگ دوبارہ بھڑک اٹھتی ہے۔’
60 سے زائد دکانوں کو نقصان پہنچا
ریسکیو 1122 ترجمان کے مطابق رات گئے بھڑکنے والی اس آگ سے 60 سے زائد دکانوں اور درجنوں کیبن کو نقصان پہنچا ہے۔ فائر فائٹرز کو آگ بجھانے میں مشکلات کا سامنا ہے۔ پلازے کا ایک ہی گیٹ ہے جبکہ ہنگامی صورت حال کے لیے کوئی انتظام موجود نہیں ہے۔
