چیف آف آرمی اسٹاف جنرل سید عاصم منیر نے کہا ہے کہ دہشتگردوں کے خلاف تو افواج پاکستان لڑ سکتی ہیں مگر دہشتگردی کے خلاف پوری قوم کا تعاون ضروری ہے، سوشل میڈیا پر پروپیگنڈا کا مقصد بے یقینی، افرا تفری اور مایوسی پھیلانا ہے۔
آرمی چیف جنرل سید عاصم منیر نے جناح کنونشن سینٹر اسلام آباد میں ’پاکستان نیشنل یوتھ کانفرنس‘ سے تاریخی خطاب کیا ہے۔
آرمی چیف نے کہاکہ سوشل میڈیا کی خبروں کی تحقیق بہت ضروری ہے کیونکہ تحقیق اور مثبت سوچ کے بغیر معاشرہ افراتفری کا شکار رہتا ہے۔
مزید پڑھیں
’اللہ تعالیٰ قرآن مجید میں فرماتے ہیں کہ اے ایمان والو! اگر کوئی فاسق تمہارے پاس کوئی خبر لے کر آئے تو اُس کی تصدیق کرلو‘۔
آرمی چیف نے کہاکہ پاکستان کے مستقبل کے معماروں اور اقبال کے شاہینوں سے مخاطب ہو کر انتہائی خوشی محسوس کر رہا ہوں، پاکستان کو بنانے کا مقصد یہ تھا کہ ہمارا مذہب، تہذیب و تمدن ہر لحاظ سے ہندوؤں سے مختلف ہے نا کے ہم مغربی تہذیب و تمدن کو اپنا لیں۔
جنرل عاصم منیر نے کہاکہ نوجوانوں کو اپنے وطن، قوم، ثقافت، تہذیب و تمدن اور اپنے آپ پر بے پناہ اعتماد ہونا چاہیے، پاکستان کے نوجوانوں کو اس بات کا یقین ہونا چاہیے کہ وہ ایک عظیم وطن اور قوم کے سپوت ہیں۔
قیام پاکستان کی ریاست مدینہ سے مماثلت ہے
انہوں نے کہاکہ ہمارے ملک کے نوجوان اس قوم و ملک کی روشن روایات، اقبال اور قائد کے خوابوں کی تعبیر کے امین ہیں۔ پاکستان کے قیام کی ریاست مدینہ سے مماثلت ہے کیونکہ دونوں کلمے کی بنیاد پر قائم ہوئیں۔
آرمی چیف نے کہاکہ اللہ تعالیٰ نے پاکستان کو بے پناہ معدنی وسائل، زراعت اور نوجوان افرادی قوت جیسی نعمتوں سے نوازا ہے، مسلمان مشکل میں صبر اور آسانی میں اللہ کا شکر ادا کرتا ہے۔
سپہ سالار نے کہاکہ ہماری افواج ہر قسم کے خطرے اور سازش کے خلاف ہمہ دم تیار ہیں، پاکستان ہے تو ہم ہیں، پاکستان نہیں تو ہم کچھ بھی نہیں ہیں۔
پاکستان اپنی خود مختاری پر کوئی سمجھوتہ نہیں کرے گا
انہوں نے کہاکہ پاکستان اپنی خود مختاری پر کوئی سمجھوتہ نہیں کرے گا۔ پاکستان کے روشن مستقبل پر کامل یقین اور اسلاف کی میراث کو قائم رکھنا ہے۔
طلبا نے آرمی چیف جنرل عاصم منیر کے خطاب کے دوران پاکستان آرمی زندہ باد، پاکستان زندہ باد اور قائداعظم زندہ باد کے نعرے بھی لگائے۔
