خیبرپختونخوا کے علاقے بنوں میں سابق صوبائی وزیر اور پی کے 101 سے پی ٹی آئی کے حمایت یافتہ امیدوار ملک شاہ محمد کی رہائشگاہ کے سامنے دھماکا ہوا ہے جس کے نتیجے میں 2 افراد زخمی ہو گئے ہیں۔
پولیس نے بتایا ہے کہ نامعلوم افراد نے بارودی مواد ملک شاہ محمد کی رہائشگاہ کے سامنے موٹرسائیکل میں نصب کیا ہوا تھا۔
مزید پڑھیں
پولیس کے مطابق دھماکے میں زخمی ہونے والے افراد کو طبی امداد کے لیے اسپتال منتقل کر دیا گیا ہے۔
پولیس نے مزید بتایا کہ جس وقت دھماکا ہوا ملک شاہ محمد گھر پر موجود نہیں تھے۔
پولیس کے مطابق علاقے کو گھیرے میں لے کر سرچ آپریشن شروع کر دیا گیا ہے اور ملزمان کی تلاش کی جا رہی ہے۔
واضح رہے کہ ملک بھر میں 8 فروری کو عام انتخابات ہونے جا رہے ہیں، اس سے قبل ملک کی اہم سیاسی شخصیات کو سیکیورٹی تھریٹس ہیں۔
اس سے قبل کئی سیاسی رہنماؤں پر حملے ہو چکے ہیں۔ سربراہ جے یو آئی مولانا فضل الرحمان کے قافلے کو بھی نشانہ بنایا جا چکا ہے۔
مولانا فضل الرحمان نے سیکیورٹی اور موسم کی صورت حال پر کہا تھا کہ اگر انتخابات کچھ وقت کے لیے آگے بھی ہو جائیں کوئی فرق نہیں پڑے گا۔
