جماعت اسلامی پاکستان کے امیر سراج الحق نے کہا ہے کہ کراچی کے عوام نے آج اپنا فیصلہ سنا دیا ہے۔ 8 فروری پاکستان بھر سمیت سندھ اور کراچی سے ڈاکو راج کے خاتمے کا دن ہوگا۔
کراچی میں جلسہ عام سے خطاب کرتے ہوئے سراج الحق نے کہاکہ میں قوم کو یقین دلاتا ہوں کہ اب پیپلزپارٹی، مسلم لیگ ن اور ایم کیو ایم کا دور کبھی واپس نہیں آئے گا۔
انہوں نے کہاکہ اللہ نے ہمیں زرخیز زمینیں عطا کی ہیں، ہماری زمینیں سونا اگلتی ہیں، ملک میں تمام تر وسائل ہونے کے باوجود مہنگائی، بیروزگاری اور افراتفری کی ذمہ دار وہی حکومتیں ہیں جنہوں نے 76 برس حکومت کی۔
سراج الحق نے بلاول بھٹو پر تنقید کرتے ہوئے کہاکہ ایک شہزادہ کہتا ہے میرا نانا اور میری والدہ وزیراعظم رہے ہیں اس لیے مجھے بھی وزیراعظم بنایا جائے۔
انہوں نے نوازشریف کو للکارتے ہوئے کہاکہ 3 بار وزیراعظم بننے والا بھی کہتا ہے کہ ایک باری اور دی جائے تو میں ان سب کو کہتا ہوں کہ اب تمہاری باریاں ختم ہو چکی ہیں، اب عوام کی باری ہے۔
جلسے میں امیر جماعت اسلامی پاکستان محترم جناب سراج الحق کی آمد پر جوش استقبال ۔#JI_KhiPowerShow pic.twitter.com/zoLkirJ6ry
— Jamaat e Islami Karachi (@KarachiJamaat) January 28, 2024
جماعت اسلامی پاکستان کے امیر نے کہاکہ پاکستان میں مہنگائی کی وجہ سے غریب آدمی کا جینا مشکل ہو گیا لیکن ان کے گھوڑے مربے کھاتے ہیں، اور ان کی بلیوں کی خوراک بھی فرانس سے منگوائی جاتی ہے۔
سراج الحق نے کہاکہ ہم اس صبح کے انتظار میں ہیں جو غریبوں کے لیے خوشیوں کا پیغام لائے، جو مظلوموں کے لیے انصاف کا پیغام لائے، جو طلبہ کے لیے اچھی تعلیم کا پیغام لائے۔
امیر جماعت اسلامی پاکستان نے کہاکہ پاکستان کو ان لوگوں کی ضرورت نہیں جنہوں نے اپنی باریاں لے کر ملک کو تماشا بنا دیا۔
نوازشریف نے اپنے منشور سے ووٹ کو عزت دو کا نعرہ نکال دیا
انہوں نے کہاکہ نوازشریف کا منشور وہی پرانا منشور ہے، بس ایک فقرے کی کمی ہے کہ ووٹ کو عزت دو، وہ اس نعرے سے توبہ کر چکے ہیں۔
سراج الحق نے کہاکہ وہ سمجھ گئے ہیں کہ جتنا دبنا ہے دب جائیں لیکن کسی بھی قیمت پر اقتدار مل جائے۔ مگر میں کہنا چاہتا ہوں کہ اب ان لوگوں کو وزیراعظم کی کرسی نصیب نہیں ہوگی۔
انہوں نے کہاکہ پاکستان چند وڈیروں اور جاگیرداروں کا نہیں پاکستانیوں کا ہے۔ ہمارے ملک میں 5 ہزار ارب سالانہ کرپشن ہوتی ہے، اسی وجہ سے ملک ترقی نہیں کر رہا۔
امیر جماعت اسلامی نے کہاکہ ہم اقتدار میں آکر ان کرپٹ عناصر کا احتساب کریں گے، ان کی گردن پر پاؤں پر رکھ کر حساب لیں گے۔
ذہین لوگ پاکستان چھوڑ کر جا رہے ہیں
انہوں نے کہاکہ جو بھی لکھا پڑھا نوجوان ہے وہ ملک چھوڑ جاتا ہے کیونکہ یہاں پر ذہین لوگوں کے لیے اب کوئی جگہ نہیں رہی۔
سراج الحق نے کہاکہ مسلم لیگ ن اور پیپلزپارٹی اسٹیل ملز، ریلوے اور پی آئی اے کو ٹھیک نہیں کر سکیں اور تمام ادارے خسارے پر چل رہے ہیں۔ ان لوگوں سے کیا امید رکھی جا سکتی ہے کہ پاکستان کو ٹھیک کریں گے۔
انہوں نے کہاکہ ملک کے مسائل کا حل صرف جماعت اسلامی کے پاس ہے کیونکہ ہمارے پاس ٹیم موجود ہے۔
کراچی کے عوام کے پاس اب ترازو کے علاوہ کوئی آپشن نہیں، حافظ نعیم الرحمان
قبل ازیں جماعت اسلامی پاکستان کراچی کے امیر حافظ نعیم الرحمان نے خطاب کرتے ہوئے کہاکہ کراچی آگے بڑھتا ہے تو پورا پاکستان آگے بڑھتا ہے، کراچی کے عوام کے پاس اب ترازو کے علاوہ کوئی آپشن نہیں۔ کراچی کو اس کا مالیاتی حق دیں تو ملک کو کشکول اٹھانے کی ضرورت نہیں پڑے گی۔
Related Posts
حافظ نعیم نے جلسے کے دوران سیاسی مخالفین پر تنقید کرتے ہوئے کہاکہ بلاول بھٹو سے کہتا ہوں آپ کبھی وزیراعظم نہیں بن سکتے۔ ’مسترد شدہ لوگوں کو مسلط کرنے کی کوشش نہ کی جائے کیونکہ شہر جاگ رہا ہے‘۔
انہوں نے کہاکہ ہم کسی سے فیور نہیں مانگ رہے نا ہی یہ کہہ رہے ہیں کہ ہماری بات ہو گئی ہے، ہم بس یہ کہتے ہیں کہ اگر ہم جیت رہے ہیں تو جیتنے دیا جائے۔
میئر کراچی کے انتخاب میں ہمارے حق پر ڈاکا ڈالا گیا
انہوں نے کہاکہ میئر کراچی کے انتخاب میں ہمارے مینڈیٹ پر ڈاکہ مارا گیا۔ سوداگروں نے ہمارے مینڈیٹ کی توہین کی۔
حافظ نعیم الرحمان نے کہاکہ سازش کے تحت انٹر کے طلبا کو فیل کرنا شروع کر دیا گیا ہے، یہ بھیڑیے نہیں چاہتے کہ یہ نوجوان یونیورسٹیوں کے ٹیسٹ میں شامل ہوں۔
انہوں نے مطالبہ کیا کہ کراچی کے نوجوانوں کے لیے سرکاری نوکریوں کے دروازے کھولے جائیں، کراچی کو حق دیا جائے تو یہ پاکستان کو دنیا کا ترقی یافتہ ملک بنائے گا۔