سندھ میں قیدیوں کو عدالتوں میں پیش کرنے کا مسئلہ ہمیشہ کے لیے حل ہو گیا ہے۔
چیف جسٹس سندھ ہائیکورٹ عقیل احمد عباسی کی عدالتی نظام میں اصلاحات کے باعث جیلوں سے قیدیوں کے لیے ویڈیو لنک کا نظام متعارف کروادیا گیا ہے۔
سندھ ہائیکورٹ کے اعلامیے میں کہا گیا ہے کہ منگل کے روز چیف جسٹس عقیل عباسی اور جسٹس نعمت اللہ پھلپوٹو نے سینٹرل جیل کراچی میں ویڈیو لنک سسٹم کا افتتاح کیا، جیلوں سے اب قیدیوں کی ویڈیو لنک کے ذریعہ عدالت میں پیشی ہوگی۔
اعلامیے کے مطابق ویڈیو لنک کے ذریعے قیدیوں کی عدالت میں پیشی سے مقدمات جلد نمٹائے جا سکیں گے اور قیدیوں کی ویڈیو لنک سے پیشی سے ٹرانسپورٹیشن کے اخراجات کی بچت ہوگی۔
عدالت نے اپنے اعلامیے میں کہا ہے کہ جیلوں سے قیدیوں کو عدالت میں پیش کرنے سے پیدا ہونے والے سیکورٹی مسائل بھی حل ہو جائیں گے، ویڈیو لنک کے ذریعے مقدمات میں پیشی کا نظام صوبے بھر میں لایا جائے گا، عدالتی فیصلوں کی تصدیق شدہ نقول کے حصول کے لیے بھی ون ونڈو نظام متعارف کرایا گیا ہے، ون ونڈو کی سہولیات سے وکلا اور سائلین کو فائدہ ہوگا۔
اعلامیے میں کہا گیا ہے کہ بطور ضمانت جمع کروائے گئے پراپرٹی کے کاغذات کی فوری اور جلد تصدیق کے لیے بورڈ آف ریونیو سے مل کر کام کررہے ہیں تاکہ وکلا اور سائلین کو تصدیق کے عمل میں حائل رکاوٹیں دور کی جاسکیں، سندھ ہائیکورٹ کے ان اقدامات کا مقصد سائلین کو بروقت انصاف کی فراہمی ہے۔
