ملک کے بیشتر بالائی علاقوں میں 5 فروری تک بارش اور پہاڑوں پر برفباری کا امکان ہے جبکہ 8 فروری تک مطلع صاف اور موسم خشک اور سرد رہے گا۔
Related Posts
محکمہ موسمیات کے ڈائریکٹر ظہیر احمد بابر کے مطابق 5 فروری تک ملک کے بیشتر علاقوں میں وقفے وقفے سے بارش اور پہاڑوں پر برفباری ہوگی جبکہ 5 فروری کے بعد ملک کے بیشتر علاقوں میں مطلع صاف اور موسم خشک اور سرد رہے گا۔
ظہیر احمد بابر کے مطابق 8 فروری کو الیکشن کے دن بھی ملک کے زیادہ ترعلاقوں میں مطلع صاف رہنے کا امکان ہے۔ 8 فروری کو صبح کے وقت میدانی علاقوں، خاص طور پر پنجاب اور سندھ کے میدانی علاقوں میں ہلکی دھند ہوسکتی ہے لیکن مجموعی طور پر موسم خشک رہے گا۔
دوسری طرف سیاحوں کی بڑی تعداد برفباری کے دلکش مناظر سے محظوظ ہونے کے لیے مری سمیت دیگر شمالی علاقہ جات پہنچ گئی ہے مگر اب ملکہ کوہسار میں مزید سیاحوں کی گنجائش نہیں ہے اس لیے انتظامیہ نے مری میں سیاحوں کا داخلہ بند کردیا ہے۔
مری میں مسلسل برفباری سے سڑکوں پر پھسلن کے باعث ٹریفک جام ہوگیا جس سے سڑکوں پر گاڑیوں کی لمبی قطاریں لگ گئیں اور سیاح گاڑیوں میں پھنس کر رہ گئے۔
شدید برفباری کے باعث مری کے مختلف علاقوں میں بجلی کی سپلائی منقطع ہوگئی جس سے شہریوں کو مشکلات کا سامنا ہے۔
