ملک میں 8 فروری کو ہونے والے عام انتخابات میں کامیاب ہونے والے آزاد امیدواروں کی سیاسی جماعتوں میں شمولیت کے لیے آئینی درخواست دائر سپریم کورٹ میں دائر کر دی گئی۔
تفصیلات کے مطابق، درخواست گزار مولوی اقبال حیدر نے اپنی درخواست میں عدالت سے استدعا کی ہے کہ آزاد امیدواروں کو سیاسی جماعتوں میں شامل ہوئے بغیر حکومت کی تشکیل سے روکا جائے۔
Related Posts
درخواست میں مؤقف اپنایا گیا ہے کہ آئین کے مطابق تمام آزاد امیدواروں کو 3 دن کے اندر سیاسی جماعت میں شامل ہونے کا پابند قرار دیا جائے، الیکشن کمیشن کو کہا جائے کہ نوٹیفیکیشن میں آزاد امیدواروں کو سیاسی جماعتوں میں شامل ہونے کا پابند بنائے۔
درخواست میں کہا گیا ہے کہ الیکشن کمیشن کو سیاسی جماعتوں میں شامل نہ ہونے والے آزاد امیدواروں کا نوٹیفیکیشن روکنے اور ان کی نشستیں خالی ڈکلیئر کرنے کا مجاز قرار دیا جائے۔
سپریم کورٹ میں جمع کرائی گئی درخواست میں مزید کہا گیا ہے اراکین اسمبلی کے آزاد امیدواروں کے اسمبلی میں رہنے کا قانون آئین کے اور پارلیمانی نظام جمہوریت کے بر خلاف ہے، قومی و صوبائی اسمبلیوں کے آزاد امیدوار خواتین اور اقلیتوں کی مخصوص نشستیں حاصل کرنے کے بھی اہل نہیں۔
درخواست میں مؤقف اپنایا گیا کہ سیاسی جماعت میں شامل ہوئے بغیر اراکین اسمبلی کا صرف وزیراعظم کے انتخاب اور عدم اعتماد میں ہی کردار ہوتا ہے، آزاد اراکین اسمبلی کی ووٹنگ عمل میں اہمیت کی وجہ سے ہارس ٹریڈنگ اور کرپٹ پریکٹس میں اضافہ ہوتا ہے۔ درخواست میں وفاق، الیکشن کمیشن اور چیف الیکشن کمشنر کو فریق بنایا گیا ہے۔
