ریڈیو اور ٹیلی ویژن کے معروف اداکار قاضی واجد کی برسی آج 11 فروری کو منائی گئی۔ ریڈیو اور ٹیلی وژن پر متعدد یادگار کردار ادا کرنے والے قاضی واجد کا اصل نام قاضی عبدالواجد انصاری تھا۔ وہ 1943ءکو لاہور میں پیدا ہوئے۔
10 برس کی عمر میں اپنے فنی کیریئر کا آغاز
قاضی واجد نے 10 برس کی عمر میں اپنے فنی کیریئر کا آغاز کیا اور پہلی مرتبہ ریڈیو پاکستان پر بچوں کے پروگرام نونہال میں صدا کاری کے جوہر دکھائے۔
قاضی واجد 25 برس تک ریڈیو سے منسلک رہے اور اپنی شاندار صدا کاری سے سب کو اپنے سحر میں جکڑے رکھا، بعدازاں 60 کی دہائی میں پاکستان ٹیلی ویژن کے آغاز پر قاضی واجد ٹی وی سے منسلک ہو گئے۔
پہلا ڈراما
قاضی واجد کا ٹی وی کے لیے پہلا ڈراما ایک ہی راستہ 1967میں نشر کیا گیا۔ جس میں انہوں نے منفی کردار نبھایا، تاہم 1969 میں ڈراما ’خدا کی بستی‘ شروع ہوا تو اس میں قاضی واجد کو راجا کا کردار ملا جس نے انہیں ملک بھر میں مشہور کردیا۔
یادگار کردار
دھوپ کنارے، ان کہی، تنہائیاں، حوا کی بیٹی، خدا کی بستی، چاند گرہن، پل دو پل، تعلیم بالغاں اور انارکلی میں یادگار کارکردگی پر انہیں ہمیشہ یاد رکھا جائے گا۔
Remembering veteran radio and television personality, a dedicated actor and a lovable human being, Qazi Wajid on his first death anniversary.
For his contributions as an artist, he was honoured with the Pride of Performance Award in 1988.#QaziWajid pic.twitter.com/w5ogTXhatB— Government of Pakistan (@GovtofPakistan) February 11, 2019
قاضی واجد 11 فروری 2018کو دل کا دورہ پڑنے کی وجہ سے کراچی میں انتقال کرگئے۔
صدارتی تمغہ برائے حسن کارکردگی
حکومت پاکستان نے 14 اگست 1988 کو قاضی واجد کو صدارتی تمغہ برائے حسن کارکردگی سے نوازا۔ قاضی واجد کی برسی کے موقع پر فنکار برادری اور ان کے مداحوں نے ان کی خدمات پر شاندار انداز میں خراج تحسین پیش کیا۔ اس حوالہ سے ملک کے مختلف چھوٹے بڑے شہروں میں دعائیہ تقریبات کا بھی اہتمام کیا گیا۔
