مسلم لیگ ن کا حکومت بنانے میں تعاون کے پیپلزپارٹی کے اعلان کا خیرمقدم

پاکستان مسلم لیگ ن نے پیپلزپارٹی کی جانب سے وزارت عظمیٰ کے لیے حمایت کرنے کا خیرمقدم کیا ہے۔

ترجمان مسلم لیگ ن مریم اورنگزیب نے کہا ہے کہ حکومت بنانے میں ہماری حمایت کرنے کا پیپلزپارٹی کا فیصلہ خوش آئند ہے، تاہم ابھی بلاول بھٹو نے پریس کانفرنس کی ہے، پیپلزپارٹی ہمیں اس معاملے پر باضابطہ طور پر بتائے گی۔

انہوں نے کہاکہ پیپلزپارٹی کی جانب سے باضابطہ طور پر بتائے جانے کے بعد ہم مشاورت کر کے اعلان کریں گے۔

یاد رہے کہ چیئرمین پی پی پی بلاول بھٹو نے اعلان کیا ہے کہ ہم وزارت عظمیٰ کے لیے مسلم لیگ ن کی حمایت کریں گے مگر وزارتیں نہیں لیں گے۔

انہوں نے کہاکہ ہم ملک میں سیاسی انتشار نہیں چاہتے، اس وقت ایک بار پھر پاکستان کھپے کا نعرہ لگانے کا وقت ہے۔

بلاول بھٹو کا کہنا تھا کہ ہمیں وفاق میں مینڈیٹ نہیں ملا اس لیے خود کو وزارت عظمیٰ کا امیدوار ظاہر نہیں کررہا۔