تحریک انصاف کےمقتول کارکن علی بلال المعروف ظلِ شاہ کے والد نے کہا ہے کہ بیٹے کے قتل کی ایف آئی آر میں کسی کو نامزد نہیں کروں گا۔
ٹوئٹر پر تحریک انصاف کے جاں بحق کارکن علی بلال عرف ظل شاہ کے والد کی ایک ویڈیو وائرل ہے جس میں وہ کہہ رہے ہیں کہ بیٹے کے قتل کی ایف آر میں وزیر اعلٰی کو نامزد کرنا چاہتا ہوں نہ ڈی آئی جی کو اور نہ آئی جی کو، نہ ایس ایچ او کو اور نہ کسی اور کو۔
انہوں نے کہا کہ جب میں جائے وقوعہ پر تھا ہی نہیں تو کیوں کسی کو خراب کروں، میں نے اللہ کو جواب دینا ہے۔
آخر ظلِ شاہ کے والد کو فتح کر لیا گیا 💔
— Abuzar Furqan (@AbuzarFurqan) March 10, 2023
واضح رہے کہ گزشتہ دنوں لاہور میں تحریک انصاف کی عدلیہ بچاؤ ریلی کے دوران ظلِ شاہ کی تشدد سے موت واقع ہوگئی تھی۔ تحریک انصاف نے دعوٰی کیا تھا کہ ظلِ شاہ کی موت پولیس تشدد کے باعث ہوئی ہے۔
سی سی پی او لاہور بلال کمیانہ نے ظلِ شاہ کی پولیس تشدد سے ہلاکت کی تردید کرتے ہوئے کہا تھا کہ ان کی ہلاکت کا تعین پوسٹ مارٹم رپورٹ آنے کے بعد ہی ممکن ہوسکے گا۔
مقتول علی بلال کے والد کی جانب سے تھانہ ریس کورس کو دی گئی ابتدائی درخواست میں نگران وزیراعلی محسن نقوی، وفاقی وزیر داخلہ رانا ثنا اللہ خان، سی سی پی او لاہور بلال صدیق کمیانہ اور سب انسپکٹر ریحان سمیت دیگر کو نامزد کیا گیا تھا۔
