الیکشن کمیشن نے کوئٹہ سے بلوچستان اسمبلی کی نشست پی بی 44 کے ریٹرننگ آفیسر کے قابل ضمانت وارنٹ گرفتاری جاری کردیے۔
کمیشن کے اراکین نثار درانی اور شاہ محمد جتوئی پر مشتمل بینچ نے حلقے سے امیدوار عطا محمد بنگلزئی کے درخواست پر ریٹرننگ آفیسر کے وارنٹ جاری کیے۔
کمیشن نے عطا محمد بنگلزئی کے درخواست پر ریٹرننگ آفیسر کو فارم 49 جاری نہ کرنے کا حکم دیا تھا۔
درخواست گزار نے موقف اختیار کیا کہ الیکشن کمیشن کے حکم کے باوجود ریٹرننگ آفیسر نے پرانی تاریخ پر فارم 49 جاری کیا۔ اور یہ اقدام توہین عدالت کے زمرے میں آتا ہے۔
درخواست گزار کے وکیل نے آر او کے خلاف توہین عدالت کی کارروائی کرنے کی درخواست کی تھی۔ کمیشن نے اس کا نوٹس لیتے ہوئے آج آر او کو ذاتی طور پر پیش ہونے کا حکم دیا تھا، تاہم وہ پیش نہیں ہوئے۔
آر او کے پیش نہ ہونے پر کمیشن نے انہیں توہین عدالت کا نوٹس جاری کردیا اور قابل ضمانت وارنٹ گرفتاری جاری کر دیے۔
الیکشن کمیشن نے کہاکہ آر او کے قابل ضمانت وارنٹ گرفتاری پر عملدرآمد ضلعی پولیس آفیسر کوئٹہ کریں گے۔
الیکشن کمیشن نے آر او کو 19 فروری کو پیش کرنے کا حکم دیا ہے۔