الیکشن کمیشن آف پاکستان نے کمشنر راولپنڈی لیاقت علی چٹھہ کے عام انتخابات میں دھاندلی سے متعلق الزامات کی تحقیقات کے لیے اعلیٰ سطح کی کمیٹی قائم کردی ہے۔
ترجمان الیکشن کمیشن نے بتایا ہے کہ کمشنر راولپنڈی لیاقت علی چٹھہ کی جانب سے الیکشن میں دھاندلی کے الزامات پر الیکشن کمیشن کا ایک خصوصی اجلاس منعقد ہوا جس میں کمیشن کے اراکین نے شرکت کی۔
مزید پڑھیں
اعلامیہ کے مطابق اجلاس میں چیف الیکشن کمشنر سکندر سلطان راجا اور ممبر الیکشن کمیشن پنجاب بابر حسن بھروانہ نے آئن لائن شرکت کی۔
اجلاس میں کمشنر راولپنڈی کی جانب سے لگائے گئے الزامات پر غوروخوض کیا گیا اور ان الزامات کی چھان بین کے لیے ایک اعلیٰ سطح کی کمیٹی تشکیل دینے کا فیصلہ کیا گیا۔
اعلامیہ کے مطابق کمیٹی کی صدارت سینیئر ممبر الیکشن کمیشن کریں گے۔جبکہ کمیٹی میں سیکریٹری، اسپیشل سیکریٹری اور ایڈیشنل ڈائریکٹر جنرل قانون شامل ہوں گے۔
اعلامیہ کے مطابق یہ کمیٹی آراوز اور ڈی آراوز کے بیانات قلمبند کرے گی اور 3 روز میں اپنی رپورٹ پیش الیکشن کمیشن کو پیش کرےگی۔
الیکشن کمیشن نے کہا ہے کہ کمیٹی کی رپورٹ آنے کے بعد کمشنر راولپنڈی کے خلاف توہین الیکشن کمیشن اور دیگر قانونی کارروائی کے بارے میں فیصلہ کیا جائے گا۔
واضح رہے کہ کمشنر راولپنڈی لیاقت علی چٹھہ نے الزام عائد کیا ہے کہ عام انتخابات میں دھاندلی کے لیے ان پر دباؤ ڈالا گیا۔ ان کا یہ بھی کہنا تھا کہ جو جرم کیا ہے اس کی سزا مجھے ملنی چاہیے۔
لیاقت علی چٹھہ نے چیف جسٹس کے بھی دھاندلی منصوبے میں شامل ہونے کا الزام عائد کیا تھا، جس کے ردعمل میں چیف جسٹس قاضی فائز عیسیٰ نے کہاکہ الزام تو کوئی بھی لگا سکتا ہے، کوئی ثبوت بھی تو ہونا چاہیے۔
