خیبرپختونخوا کے علاقے مالاکنڈ درگئی میں فائرنگ ہوئی ہے جس کے نتیجے میں نگراں وزیراعلیٰ ارشد حسین شاہ کے سیکیورٹی اسکواڈ انچارج وکیل خان ساتھی سمیت جاں بحق ہو گئے ہیں۔
واقعہ اس وقت پیش آیا جب وکیل خان اپنے ساتھی اور بچوں کے ہمراہ موٹرسائیکل پر گھر جارہے تھے۔ فائرنگ کے نتیجے میں 2 بچے بھی شدید زخمی ہو گئے ہیں۔
واقعے کی اطلاع ملتے ہی وکیل خان کے بڑے بھائی سعیداللہ دل کا دورہ پڑنے سے چل بسے ہیں۔
مزید پڑھیں
نگراں وزیراعلیٰ ارشد حسین شاہ نے رپورٹ طلب کر لی
دوسری جانب نگراں وزیراعلیٰ ارشد حسین شاہ نے واقعے کا نوٹس لیتے ہوئے پولیس کے اعلیٰ حکام کو رپورٹ پیش کرنے کی ہدایت کی ہے۔
نگراں وزیراعلیٰ نے واقعے پر دلی افسوس کا اظہار کرتے ہوئے ہدایات دی ہیں کہ فائرنگ میں ملوث عناصر کی فوری گرفتاری کے لیے ضروری کارروائی عمل میں لائی جائے۔
نگراں وزیراعلیٰ نے کہا ہے کہ قتل کے اس اندوہناک واقعے میں ملوث عناصر قانون کی گرفت سے کسی صورت بچ نہیں سکتے۔ انہیں جلد گرفتار کرکے قانون کے کٹہرے میں کھڑا کیا جائے گا۔
انہوں نے کہاکہ وکیل خان ایک محنتی اور فرض شناس آفیسر تھے، میں جاں بحق افراد کے اہل خانہ کے غم میں برابر کا شریک ہوں۔
وزیراعلیٰ نے متاثرہ خاندانوں سے دلی ہمدردی اور تعزیت کا اظہار کرتے ہوئے جاں بحق افراد کی معفرت اور پسماندگان کے لیے صبر جمیل کی دعا کی ہے۔