تحریک انصاف کا ہر صورت ریلی نکالنے کا اعلان، رینجرز طلب

تحریک انصاف کی جانب سے ریلی کے اعلان کے بعد نگران پنجاب حکومت نے لاہور میں رینجرز کو طلب کر لیا ہے۔

میڈیا رپورٹس کے مطابق پنجاب حکومت نے پی ٹی آئی کی ریلی روکنے کے لیے رینجرز کو طلب کرلیا ہے۔ رینجرز کی نفری کو زمان پارک کے ساتھ ساتھ دیگر اہم مقامات پر تعینات کیا جائے گا۔

گزشتہ روز تحریک انصاف کے سربراہ عمران خان کی جانب سے لاہور میں ریلی نکالنے کا اعلان کیا گیا تھا۔ سابق وزیراعظم عمران خان نے ویڈیو لنک پر خطاب میں کہا تھا کہ سب تیار ہوں کل (آج) دو بجے الیکشن ریلی کی قیادت کروں گا۔ جس کے بعد پنجاب حکومت نے لاہور میں دفعہ 144 نافذ کردی تھی۔

نگران وزیر اطلاعات عامر میر نے گزشتہ روز کہا تھا کہ اتوار کے روز لاہور میں پی ایس ایل کا میچ، میراتھن ریس اور سائیکل ریلی ہے جس کی وجہ سے عمران خان کو ریلی کی اجازت نہیں دے سکتے۔

دوسری جانب میڈیا سے گفتگو کرتے ہوئے تحریک انصاف کے وائس چیئرمین شاہ محمود قریشی نے حکومتی اقدامات کو مسترد کرتے ہوئے کہا ہے کہ الیکشن شیڈول آنے کے بعد پابندی کا کوئی جواز نہیں ہے۔ ہر صورت میں ریلی نکالی جائے گی۔ اس حوالے سے الیکشن کمیشن اورلاہور ہائیکورٹ سے بھی رجوع کریں گے۔