بھارتی اداکار اور ہدایتکار ستیش کوشک کو 15 کروڑ روپے کے قرض کے لیے قتل کیے جانے کا دعویٰ سامنے آ گیا۔
غیر ملکی میڈیا رپورٹس کے مطابق دہلی کی پولیس کو ایک خط موصول ہوا ہے جس میں ستیش کوشک کو قتل کیے جانے کا دعویٰ کیا گیا ہے۔
میڈیا رپورٹس کے مطابق یہ خط وکاس مالو نامی ایک بزنس میں کی دوسری بیوی سانوی مالو نے دہلی کے پولیس کمشنر کے نام لکھا ہے جس میں اس خاتون نے اپنے ہی شوہر پر قتل کا الزام لگایا ہے۔
خاتون نے اپنے خط میں لکھا ہے کہ اس کو اپنے شوہر وکاس پر شک ہے کیونکہ وکاس نے بھارتی اداکار سے 15 کروڑ کا قرض لیا تھا۔
قرض کی رقم واپسی کے لیے دونوں میں ایک ملاقات کے دوران کافی تلخ کلامی ہوئی تھی جس کے بعد اس کے شوہر نے بھارتی اداکار کو قرض واپس کرنے کا وعدہ کیا تھا۔
سانوی نے یہ بھی لکھا کہ چونکہ ستیش کوشک وکاس کے ہی فارم ہاؤس میں بیمار ہوئے تھے اس لیے انہیں شک ہے کہ ان کے شوہر نے قرض کی رقم واپس مانگنے ہر انہیں قتل کرایا ہو گا۔
یاد رہے کہ پولیس نے اسی فارم ہاؤس سے کچھ مشکوک ادویات برآمد کی تھیں جہاں بھارتی اداکار نے اپنی موت سے قبل ایک پارٹی میں شرکت کی تھی۔ جس کے بعد سفر کے دوران دل کا دورہ پڑنے سے ان کی موت واقع ہوئی تھی۔
