سینئر بھارتی فلم ساز ایم ایم بیگ اپنی رہائش گاہ پر مردہ پائے گئے۔ وہ معروف چائلڈ آرٹسٹ بیبی گڈو کے والد تھے اور متعدد ہندی فلموں سے وابستہ رہے۔
ان کے پبلسِسٹ حنیف زویری کے مطابق ایم ایم بیگ گزشتہ کچھ عرصے سے علیل تھے۔ چار سے پانچ روز تک گھر سے باہر نہ نکلنے اور مکان سے بدبو آنے پر پڑوسیوں نے پولیس کو اطلاع دی۔ پولیس نے دروازہ کھول کر اندر سے ان کی لاش برآمد کی اور اہلِ خانہ کو مطلع کیا۔ بعد ازاں میت کو پوسٹ مارٹم کے لیے اسپتال منتقل کر دیا گیا۔ ان کی عمر ستر برس سے زائد تھی۔
یہ بھی پڑھیں: بھارت: 2 مہینے میں 33 الیکشن اہلکاروں کی خودکشیاں اور اموات، وجہ کیا ہے؟
ایم ایم بیگ نے اپنے فلمی کیریئر کا آغاز بطور اسسٹنٹ ہدایتکار کیا اور جے اوم پرکاش، وِمل کمار اور راکیش روشن کے ساتھ کام کیا۔ اور ’جیسی کرنی ویسی بھرنی‘، ’آدمی کھلونا ہے‘ اور ’قرض چکانا ہے‘ سمیت مخلتف فلمی منصوبوں سے منسلک رہے۔
بطور خودمختار ہدایتکار انہوں نے دو فلمیں بنائیں جن میں نصیرالدین شاہ کی فلم ’معصوم گواہ‘ شامل ہے جو دیلیز نہ ہو سکی اور دوسری فلم ’چھوٹی بہو‘ تھی جس میں شلپا شیروڈکر نے مرکزی کردار ادا کیا۔
یہ بھی پڑھیں: جوہری تجربات: 4 کروڑ نہیں، 40 لاکھ اموات کی خاموش تاریخ
حنیف زویری کا کہنا ہے کہ بیگ کے راکیش روشن کے ساتھ خوشگوار تعلقات تھے اور انہوں نے ریتھک روشن کی پہلی فلم ’کہو نا پیار ہے‘ کے لیے ان کی ابتدائی فنی تربیت میں بھی معاونت کی تھی خاص طور پر مکالمہ ادائیگی اور آواز کے اتار چڑھاؤ کے حوالے سے۔
