سعودی خطاط صالح بن سعد المنصوف نے سعودی عرب کے پرچم پر سفید رنگ سے کلمہ طیبہ اور تلوار کو ڈیزائن کیا تھا۔ المنصوف 86 برس کی عمر میں سعودی عرب کے پرچم کے قومی دن کے دو دن بعد انتقال کر گئے۔
عرب میڈیا کے مطابق المنصوف پہلے سعودی خطاط تھے جنہوں نے جدید ٹیکنالوجی اور پرنٹنگ کی سہولیات نہ ہونے کے باوجود 1960 کی دہائی کے اوائل میں سفید رنگ سے سعودی عرب کے پرچم پر تلوار اور کلمہ طیبہ اپنے ہاتھ سے لکھنے کا اعزاز حاصل کیا تھا۔
صالح المنصوف ان پہلے خطاطوں میں سے تھے جن کے ہاتھ کی لکھائی امام محمد بن سعود یونیورسٹی کے متعدد فارغ التحصیل طلبہ کے سرٹیفکیٹس پر بھی تھی۔
یاد رہے کہ سعودی عرب کے فرمانروا شاہ سلمان نے رواں ماہ 11 مارچ کو یوم پرچم منانے کا فرمان جاری کیا تھا۔ شاہی حکم میں کہا گیا تھا کہ یوم پرچم ہر سال گیارہ مارچ کو قومی سطح پر بھرپور طریقے سے منایا جائے گا۔
شاہ سلمان نے کہا تھا کہ 24 ذوالحجۃ 1355 ہجری بمطابق 11 مارچ 1937 کو شاہ عبدالعزیز نے قومی پرچم کی توثیق کی تھی جو آج ہم سب کے سامنے ہے۔
