قومی کرکٹ ٹیم 24 مارچ سے 27 مارچ تک شارجہ میں افغانستان کے خلاف ٹی 20 سیریز کھیلے گی، اس سیریز میں پاکستانی ٹیم کی قیادت کون کرے گا ؟ اس بارے میں کھلاڑی الجھن کا شکار ہوگئے۔
میڈیا ذرائع کے مطابق پی سی بی کے سلیکشن کمیٹی نے افغانستان کے خلاف سیریز میں بابر اعظم کو آرام کروانے کا فیصلہ کیا ہے ، بابر اعظم کے آرام کرنے کی صورت میں شاہین آفریدی کپتان ہوں گے۔
اس حوالے سے پاکستانی ٹیم کے نائب کپتان شاداب خان لاعلم نکلے ۔ راولپنڈی کرکٹ اسٹیڈیم میں ایک صحافی نے شاداب خان سے سوال کیا کہ کیا افغانستان کے خلاف سیریز میں بابر اعظم اور محمد رضوان کو آرام دے کر شاہین شاہ آفریدی کو کپتان بنایا جارہا ہے؟
سوال کے جواب میں شاداب خان نے کہا کہ معلوم نہیں کہ بابر اعظم، محمد رضوان یا انہیں آرام کروایا جا رہا ہے، ایسی کوئی بات ہوتی تو ہمیں بتایا جاتا۔
شاداب خان نے کہا کہ میں نے بابر اعظم سے بھی رابطہ کر کے پوچھا ہے، انہیں بھی اس بارے میں کچھ نہیں معلوم، اگر ہمیں آرام کروایا جا رہا ہے تو بتایا جاتا۔
Shadab Khan says he isn’t aware of news about him, Babar Azam, and Mohammad Rizwan being rested for Pakistan’s next series.#Cricket | #AFGvPAK pic.twitter.com/mc7FLIk8BB
— Grassroots Cricket (@grassrootscric) March 12, 2023
دوسری جانب یہ بھی خبر ہے کہ پی ایس ایل میں لاہور قلندر کی کپتان فاسٹ بالر شاہین شاہ آفریدی سے چیئرمین پی سی بی نجم سیٹھی نے ٹیلی فونک رابطہ کر کے انہیں افغانستان کے خلاف ٹی 20 سیریز میں قومی ٹیم کی قیادت کرنے کی پیشکش کی ہے۔
چیئرمین پی سی بی کی پیشکش کے جواب میں شاہین شاہ آفریدی نے افغانستان کے خلاف ٹی 20سیریز کی قیادت کرنے کے لیے ہامی بھی بھر لی ہے۔
سابق چیئرمین پی سی بی رامیر راجہ نے پی سی بی سلیکشن کمیٹی کے اس ممکنہ فیصلے کی سختی سے مذمت کی ہے اور کہا ہے کہ پاکستان کے کلیدی کھلاڑیوں بابر، شاداب اور شاہین کو کپتانی کی جنگ میں ایک دوسرے کے خلاف کھڑا کرنا نہ صرف ماحول کو تباہ کر دے گا بلکہ بابر اعظم کی قیادت میں بنی عظیم وائٹ بال کہانی کو ختم کر دے گا۔
رمیز راجہ نے کہا کہ پلیز! تاریخ سے سیکھیں کیونکہ 90 کی دہائی میں پاکستان کرکٹ کو اسی طرح تباہ کیا گیا تھا۔
Pitting Pak’s core players:Babar, Shadab & Shaheen against each other over captaincy battle will not only destroy a great dug out environment but kill a great white ball story built under Babar. Pls Learn from history as this is how Pak cricket was destroyed in the 90’s!!
— Ramiz Raja (@iramizraja) March 12, 2023
واضح رہے کہ افغانستان کے خلاف ٹی 20 سیریز کے لیے ٹیم کا اعلان آج ہو گا۔
