پیپلز پارٹی کے اویس قادر شاہ سندھ اسمبلی کے بارہویں اسپیکر منتخب

سید اویس قادر شاہ سندھ اسمبلی کے اسپیکر منتخب ہوگئے ہیں اور انہوں نے اسپیکر کے فرائض سنبھال لیے ہیں۔ اسپیکر آغا سراج درانی نے ان سے عہدے کا حلف لیا۔

سب کو ساتھ لے کر چلوں گا، اسپیکر اویس قادر شاہ

اسپیکر منتخب ہونے اور فرائض سنبھالنے کے بعد اجلاس سے خطاب کرتے ہوئے نو منتخب اسپیکر سندھ اسمبلی سید اویس قادر شاہ نے کہا کہ وہ چیئرمین پاکستان پیپلز پارٹی بلاول بھٹو زرداری، آصف زرداری، اور فریال تالپور کے علاوہ اپنے حلقے کے عوام کے بھی شکرگزار ہیں۔

انہوں نے کہا کہ ان کا پہلی بار ضلع سکھر سے اسپیکر سندھ اسمبلی منتخب ہونا اعزاز کی بات ہے۔ اویس قادر شاہ نے کہا کہ بطور اسپیکر وہ تمام ممبران کو ساتھ لے کر چلیں گے۔

نئے ارکان کی حلف برداری

اس سے پہلے، اسپیکر آغا سراج درانی کی سربراہی میں ہونے والے سندھ اسمبلی کے آج کے اجلاس میں 10 نئے ارکان صوبائی اسمبلی نے حلف اٹھایا۔ اسپیکر آغا سراج درانی نے نئے ارکان اسمبلی سے حلف لیا جن میں سے 9 ارکان کا تعلق سنی اتحاد کونسل سے ہے جبکہ ایک رکن کا تعلق جماعت اسلامی سے ہے۔اسپیکر آغا سراج درانی نے نو منتخب ارکان کو مبارک باد دی۔ ارکان نے سندھی، اردو اور انگریزی زبانوں میں حلف اٹھایا۔

سنی اتحاد کونسل کے رکن سندھ اسمبلی سجاد علی سومرو کا کہنا تھا کہ آج ہمارے 9 ارکان نے حلف اٹھایا ہے، ہم پی ٹی آئی کے منتخب ایم پی ایز ہیں، سنی اتحاد کونسل سے الحاق کیا ہے۔

سجاد سومرو نے کہا کہ ہم پورے کراچی میں جیت چکے ہیں، نتائج تبدیل کیے گئے، لیاری مسائل کا گڑھ ہے، گٹر کے مسائل سے نکل نہیں سکے، ہم پورے کراچی کے حقوق کی بات کریں گے۔ انہوں نے کہا کہ اسپیکر اور ڈپٹی اسپیکر کے ووٹ کا ابھی تک فیصلہ نہیں کیا۔

نئے ارکان کو خوش آمدید کہتا ہوں، مراد علی شاہ

اجلاس کے دوران پیپلز پارٹی کے رہنما و رکن اسمبلی مراد علی شاہ نے کہا کہ وہ آج اسمبلی میں حلف اٹھانے والے اراکین کو خوش آمدید کہتے ہیں۔ انہوں نے کہا کہ وہ سندھ کے عوام کی خدمت کا سلسلہ جاری رکھیں گے۔

نامزد وزیراعلیٰ مراد علی شاہ نے کہا کہ ہمارے رہنما عزیز جونیجو سینیئر سیاستدان تھے، وہ الیکشن جیت گئے تھے لیکن ان کا انتقال ہوگیا، ہمارے 12 کارکن بھی انتخابی مہم میں شہید ہوئے، اسمبلی ان تمام مرحومین کے لیے دعا کرے۔

انہوں نے کہا کہ ہمارا ملک دہشتگردی سمیت مختلف مشکلات سے گزر رہا ہے، دہشتگردوں کا مقابلہ کرتے ہوئے ہمارے فوجی اور پولیس جوان شہید ہوئے ہیں، انتقال کرنے والوں اور شہید ہونے والوں کے لیے دعا کرانا چاہتا ہوں۔

خیال رہے کہ پیپلز پارٹی کی جانب سے وزیر اعلیٰ سندھ کے لیے نامزد سید مراد علی شاہ کی حلف برداری پیر کو متوقع ہے۔

کل کتنے ارکان نے حلف نہیں اٹھایا؟

گزشتہ روز سندھ اسمبلی کے 168 ارکان میں سے 148 نے حلف لے لیا 112 ارکان پاکستان پیپلز پارٹی جبکہ 36 کا تعلق ایم کیو ایم پاکستان سے تھا، پاکستان تحریک انصاف کے حمایت یافتہ 9 ارکان، 3 جی ڈی اے، 2 جماعت اسلامی، 3 مخصوص اور 2 پیپلز پارٹی وہ ارکان جو ابھی سینٹرز ہیں نے حلف نہیں لیا۔

گزشتہ روز اپوزیشن جماعتوں کی جانب سے احتجاج کے اعلان کے بعد اسمبلی آنے والے راستوں کو نا صرف کینٹینرز لگا کر بند کیا گیا بلکہ پولیس کی بھاری نفری حفاظتی اقدامات کے ساتھ موجود رہی۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں