پاکستان تحریک انصاف (پی ٹی آئی ) کے انٹراپارٹی انتخابات کے لیے کاغذاتِ نامزدگی جمع کروا دیے گئے ہیں۔ بیرسٹر گوہر خان نے ایک مرتبہ پھر پارٹی کی مرکزی چیئرمین شپ کے لیے کاغذات جمع کرا دیے ہیں۔
اتوار کو پاکستان تحریک انصاف ( پی ٹی آئی ) کی جانب سے جاری بیان کے مطابق انٹراپارٹی انتخابات کے لیے کاغذات نامزدگی داخل کرنے کا وقت 25 فروری اتوار کو سہ پہر 3 بجے تک تھا۔
بانی چیئرمین عمران خان کے نامزدکردہ امیدوار برائے چیئرمین بیرسٹر گوہر علی خان نے انٹراپارٹی انتخابات کے لیے اپنے کاغذات نامزدگی جمع کروا دیے ہیں۔
مرکزی تنظیم کے لیے بانی چیئرمین کے نامزدکردہ امیدوار برائے مرکزی سیکرٹری جنرل عمر ایوب خان کی قیادت میں 15 رکنی پینل کے کاغذاتِ نامزدگی بھی جمع کر لیے گئے ہیں۔
پارٹی اعلامیے کے مطابق سندھ سے اشرف قریشی، بلوچستان سے محمد اسلم اور خیبرپختونخوا سے نوید انجم نے بھی چیئرمین کے عہدے کے لیے کاغذاتِ نامزدگی داخل کروائے ہیں۔
پنجاب سے بانی چیئرمین کی نامزد کردہ ڈاکٹر یاسمین راشد کے علاوہ محمد خان مدنی اور اسد حنیف نے بھی پنجاب کی صوبائی تنظیم کے لیے پینلز کے کاغذاتِ نامزدگی جمع کروائے ہیں۔
سندھ کی تنظیم کے لیے بانی چیئرمین کے نامزد کردہ حلیم عادل شیخ اور خاوند بخش غلام محمد کی قیادت میں دو پینلز کے کاغذاتِ نامزدگی موصول ہوئے ہیں۔
بلوچستان سے بانی چیئرمین کے نامزد کردہ ڈاکٹر منیر بلوچ کے علاوہ 5 دیگر افراد نے اپنے پینلز کے ہمراہ کاغذاتِ نامزدگی جمع کروائے ہیں۔
بلوچستان کی تنظیم کے لیے اپنے پینلز کے ہمراہ کاغذاتِ نامزدگی داخل کروانے والوں میں سید جعفر آغا، نوابزادہ امین اللہ جوگیزئی، داؤد شاہ، سید عبدالصادق اور بابر مرغزانی شامل ہیں۔
مزید پڑھیں
خیبرپختونخوا سے بانی چیئرمین کے نامزد کردہ علی امین گنڈا پور کی قیادت میں خیبرپختونخوا کی تنظیم کے لیے پینل کے کاغذاتِ نامزدگی بھی موصول ہوئے ہیں۔
پاکستان تحریک انصاف کے فیڈرل الیکشن کمیشن کی جانب سے انٹراپارٹی انتخابات میں شرکت کے خواہاں امیدواروں سے کاغذاتِ نامزدگی کی وصولی کے لیے مرکز اور صوبوں میں الگ الگ ریٹرننگ افسران مقرر کیے گئے ہیں۔
ملک بھر میں پاکستان تحریک انصاف کے انٹرا پارٹی انتخابات طے شدہ شیڈول کے مطابق 3 مارچ کو منعقد کیے جائیں گے ۔
