انتخابات میں مبینہ دھاندلی: حافظ نعیم الرحمان کا گورنر سندھ سے وعدہ معاف گواہ بننے کا مطالبہ

جماعت اسلامی پاکستان کراچی کے امیر حافظ نعیم الرحمان نے کہا ہے کہ 8 فروری کے انتخابات میں جلعسازی کے ذریعے عوام کی مسترد شدہ پارٹی ایم کیو ایم کو کراچی پر بٹھا دیا گیا۔

اپنے ایک بیان میں حافظ نعیم الرحمان نے کہاکہ مصطفیٰ کمال کے اعتراف جرم کے بعد جب گورنر سندھ کی گفتگو بھی سامنے آ گئی ہے تو ضروری ہے کہ کامران ٹیسوری وعدہ معاف گواہ بن جائیں۔

حافظ نعیم الرحمان نے کہاکہ کامران ٹیسوری اگر وعدہ معاف گواہ بن جاتے ہیں تو آئندہ کوئی عوام کا مینڈیٹ چوری کرنے کی جرات نہیں کر سکے گا۔

جماعت اسلامی کراچی کے امیر نے کہاکہ 8 فروری کو ہونے والے الیکشن میں فارم 45 کے مطابق ایم کیو ایم کراچی سے ایک بھی پولنگ اسٹیشن نہیں جیت سکی، ان کو فارم 47 کے ذریعے جتوایا گیا ہے۔

انہوں نے کہاکہ اب ضروری ہے کہ چیف الیکشن کمشنر فارم 45 کے مطابق انتخابی نتائج کا اعلان کریں۔

واضح رہے کہ گزشتہ روز ایک مبینہ آڈیو سامنے آئی تھی جس میں مصطفیٰ کمال یہ کہہ رہے تھے کہ پیپلزپارٹی کے مطابق ایم کیو ایم کا مینڈیٹ 100 فیصد جعلی ہے۔

اس کے بعد گورنر سندھ کامران ٹیسوری کی بھی ایک مبینہ آڈیو لیک سامنے آئی تھی، جس میں وہ یہ کہتے سنائی دے رہے ہیں کہ اگر ایم کیو ایم کا مینڈیٹ 100 فیصد جعلی ہے تو دوسری جماعتوں کا 200 فیصد جعلی ہے۔